Аудан әкімі Қайыр Рыскелдиновтың төрағалығымен валюталық нарықта қалыптасқан жағдайға байланысты әлеуметтік маңызы бар азық-түлік тауарларына баға тұрақтылығын сақтау жөнінде жедел жиын өткізілген болатын.
Жиында аудан әкімінің күнделікті тұтынатын азық-түлік өнімдерінің бағасын қалыпты ұстауды тапсырып, отандық тауарларға бағаны негізсіз көтерген кәсіпкерлерге қатаң шара қолданылатынын ескерткені өз нәтижесін бермей қойған жоқ.
Өңірде бағаны таргеттеуден кейін осы іспен нақты айналысатын арнайы штаб та құрылды. Аудан әкімі аппаратының басшысы Гүлнәр Сыздықованың айтуынша, жағдайды барынша бақылауда ұстау мақсатында күнделікті азық-түлік тауарлары саудасымен айналысатын кәсіпкерлер, жанар-жағармай станцияларының иелері, басқа да қызметтерді ұсынатын шағын және орта бизнес өкілдерімен де кездесу өткізілген.
Мұндағы басты мақсат – сан түрлі сылтауды желеу етіп, жұмысшылар саны мен жалақы мөлшерін қысқартуға жол бермеу болып табылады. Баға бойынша күн сайынғы мониторингті «Нұр Отан» партиясының мүшелері, кәсіпкерлік және өнеркәсіп бөлімінің қызметкерлері, сонымен қоса, ауылдық округ әкімдері күнделікті жүргізіп отыр.
Ауданда бағаның күрт шарықтауына еш негіз жоқ. Ұн бойынша мол тұрақтандыру қоры бар. Сондықтан да, нанның бағасы басқа өңірлерден төмен. Жалпы, бұл мәселе жергілікті биліктің бақылауында. Бұл – баға ырықсыз көтерілмейді деген сөз.
Қорғалжын ауданы
