Облыс әкімі Сергей Кулагиннің төрағалығымен өткен терроризмге қарсы комиссияның кезекті отырысында қоғамымызды алаңдатқан діни экстремизм жайлы әңгіме қозғалды.
Күн тәртібіндегі мәселе бойынша Қазақстан Республикасы Ұлттық қауіпсіздік комитетінің Ақмола облысы бойынша департаментінің басшысы Дәулет Қысталасов хабарлама жасады.
Облыс әкімі Сергей Кулагин барлық құқық қорғау органдары өз жұмысын қауіпсіздіктің алдын алуға бағыттауы қажет екенін еске салды. Бұған әр басшының жауапкершілігі керек деді. Бүгінде осындай теріс экстремистік ағымдардың жетегінде кетіп жатқан жас-
тарды арашалап қалу үшін әлеуметтік жағдайды да тұрақты шешу маңызды екенін айтты. Өз кезегінде бюджеттен де қажет болса, көзін тауып қаражат бөлуге тапсырма берді.
Одан әрі облыстық дін істері басқармасы жанындағы Конфессияаралық қарым-қатынастарды талдау және дамыту орталығының директоры Гүлнәр Кәкенова, облыс әкімі аппаратының мемлекеттік-құқықтық жұмыстар мен жұмылдыру дайындығы бөлімінің меңгерушісі, терроризмге қарсы комиссия аппаратының жетекшісі Темірбек Батырханов хабарлама жасап, өз салалары бойынша атқарылған іс-шараларды тілге тиек етті.
Қазіргі таңда ақпараттық-насихат топтарының жұмысы да маңызды болып отырғаны атап көрсетілді. Алдын алу үшін жер-жерге барып, халықтың барлық топтарымен кездесіп, әртүрлі шаралар өткізу қажет. Биылғы жылдың өзінде 800 мың адамды қамтыған 27 мың шара өткізілген. Әсіресе, ғаламтор желісі экстремизмнің өрістеуінің негізгі бір ошағы болып отыр. Сондықтан, блогерлік жұмыстарды жандандыру күн тәртібінде тұр.
Бақыт СМАҒҰЛ.
