Адам қашанда мимен жұмыс істейді. Ал, күнделікті дұрыс тамақтанбау мидың жұмысына қатты әсер етеді екен. Бұл көңіл-күйдің нашарлауына, жиі шаршауға әкеліп соғады. Мұндай жағдайға жол бермеу үшін қандай өнімдер тұтыну керектігін диетолог Елена Соломатина Sputnik радиосына берген сұхбатында айтыпты.
Сонымен, дәрігердің пікіріне жүгінсек, тағамның құрамында холиннің жеткілікті мөлшері болуы маңызды. Ол жұмыртқаның сарысында, қой етінде, сондай-ақ, сұлы мен түрлі-түсті қырыққабатта болады. В 12 дәрумені мен темірге бай өнімдерді де жиі тұтыну қажет. Мұның бәрі мидың жұмысын ынталандыратынын айтқан дәрігер:
– Холин – ацетилхолиннің бастамашысы, ол жүйке импульсінің берілу жылдамдығын қамтамасыз етеді. B12 дәрумені бар өнімдерді тұтыну маңызды. Ағзада оның мөлшері азайса, бастың айналуы, шаршаңқылық пайда болады. Ми үнемі оттегі алуы үшін темірге бай өнімдер – бауыр, қызыл ет жеген абзал, – дейді диетолог.
Десе де, ол аталған өнімдерді шамадан тыс тұтыну ағзаға кері әсер етуі мүмкін екенін ескертеді. Мөлшерсіз тамақтану кезінде олардың құрамындағы токсиндер барлық пайдасын бейтараптандырады екен. Сондай-ақ, дәрігер тұтынылатын тәттілердің мөлшерін шектеп, көкөністер мен жемістерді көбірек жеуге шақырды. Олай болса, денсаулығымыздың жақсы болуы өзіміздің қолымызда. Сабырлы болып, дұрыс тамақтану мидың оттегіні мүмкіндігінше мол алуына пайдасы зор.
Асылай ҚАДЫРҚЫЗЫ.
