Ақмола облысы бойынша экология департаменті басшысының міндетін атқарушы Ержан Ахметов өңірлік коммуникациялар қызметінде журналистермен брифинг өткізіп, 2020 жылы атқарылған жұмыстардың қорытындысы және облыс жұртшылығын алаңдатып отырған экологиялық мәселер жайында сөз қозғады.
Брифингте айтылғандай, Ақмола облысы бойынша экология департаменті өңірде қалыптасқан экологиялық мәселелерді шешуге ұдайы назар аударып келеді. Департамент облыс аумағында жүйелі түрде мемлекеттік экологиялық бақылау мен экологиялық реттеу мәселелерімен айналысады. Экологиялық проблемаларды анықтап, оның шешілуін қамтамасыз етеді. Әсіресе, тұрғындардың өтініш-тілектеріне дереу көңіл бөлініп, тиісті шара қолдану қарастырылады.
– 2020 жылы департаменттің мемлекеттік экологиялық бақылау бөлімі қоршаған ортаның ластануына жол бермеу бағытында 41 тексеріс жүргізіп, 103 құқық бұзушылықты анықтады. Бұл тексерістердің 21-і жоспарлы болса, 18-і жоспардан тыс тексерістер. Осының нәтижесінде табиғатты қорғау заңнамасының бұзылғандығы үшін жалпы сомасы 1 миллион 458,450 мың теңгені құрайтын 15 әкімшілік айыппұл салынып, оның барлығы өндіріліп алынды, – деді Ержан Ахметов.
Осы сандардан аңғарып отырғанымыздай, табиғат байлығын қалай болса солай пайдаланатындармен күрес күшейе түскендігі байқалады. Бірақ та, табиғатты иесіз жатқан ен байлық деп санайтын бұрыннан қалыптасқан көзқарасты бірден өзгертудің қиын екендігі анық байқалып отырған жайы бар. Оған қоршаған ортаны қорғау заңдарының жиі бұрмаланатындығы дәлел. Сондықтан, департамент қызметкерлері жиі-жиі рейдтерге шығып, тексерістер жүргізіп тұрады. Облысымыздың табиғаты сұлу, ауасы емге дәру болғанымен, түрлі ірі кәсіпорындардан шығатын зиянды қалдықтардың адам өміріне қауіп төндіретіні сөзсіз.
Брифингте айтылғандай, тұрмыстық қалдықтарды төгу мәселесі облыс орталығы мен елорданың маңыңдағы аудандарда да өткір тұр. Бұл бағытта департамент пен жергілікті атқарушы органдар тарапынан тиісті жұмыстар атқарылуда. Мәселен, Целиноград ауданында тұрғындардың медициналық қалдықтарды жағу бойынша кәсіпорын жұмысына шағымдары бойынша тексеру іс-шаралары жүргізілді. Оның қорытындысы бойынша кәсіпорын қызметінің экологиялық талаптарға сәйкес келмейтіні анықталды. Сот сараптама қорытындысын кері қайтарып алды. Қазіргі кезде кәсіпорын осы өнеркәсіптік алаңда өндірістік қызметті жүзеге асырмайды, осылайша қоршаған ортаға және адамдардың денсаулығына теріс әсері тоқтатылды.
Бұдан бөлек, «Ғарыш Сапары» ұлттық компаниясы» акционерлік қоғамының ғарыштық мониторингі бойынша Ақмола облысында 1593 рұқсат етілмеген қоқыс үйіндісі анықталды. Экология департаменті мен облыс әкімдігі бірлесіп 920 полигонды жою бойынша жұмыс жүргізді.
– Алдыңғы жылы мемлекеттік бақылаудың жаңа үлгісі – алдын ала бақылау және қадағалаудың енгізілуіне орай, 2020 жылмен салыстырғанда әкімшілік айыппұлдардың саны азайған. Алайда, алда ауқымды міндеттер тұр. Ең алдымен, жұртшылықтың назарын қоршаған ортаға жанашырлықпен қарауға аударып, ортақ үйіміз–табиғатты қорғауға үндеуіміз керек. Бұл өткір мәселені барша халық болып жұмылғанда ғана шешуге болатынын естен шығармағанымыз жөн, – деді Ержан Ахметов.
Сонымен қатар, брифингте зертханалық талдау және бақылауға, табиғатты қорғау шараларын қаржыландыруға қатысты атқарылып жатқан жұмыстар да айтылды.
Аслан ОСПАНОВ,
«Арқа ажарының» өз тілшісі.
