Мемлекет басшысы екіжақты ынтымақтастыққа тың серпін беру тұрғысынан Армения Президентінің осы сапарының маңызды екенін атап өтті.
– Армения – бізге достас мемлекет. Елдеріміз арасындағы өзара қарым-қатынастар ежелден келе жатқан дәстүрлерге негізделеді. Әрине, біз ықпалдастығымыздың бір орнында тұрып қалмай, жаңа мазмұнмен толыға отырып дамуына мүдделіміз. Сондықтан елдеріміздің үкіметтері мен нақты салалық ведомстволары осы мақсатқа қол жеткізу үшін жұмыс істеп жатыр, – Қасым-Жомарт Тоқаев.
Қазақстан Президенті түрлі салалар бойынша қарым-қатынастарды нығайту үшін мол мүмкіндіктер бар екенін атап өтіп, Арменияның үкіметтік делегациясының жуырда Қазақстанға жасаған сапарының қорытындыларын оң бағалады.
Сонымен қатар Мемлекет басшысы ЕАЭО, ҰҚШҰ, ТМД, БҰҰ және ЕҚЫҰ аясындағы екіжақты ықпалдастықтың жақсы қарқынмен жалғаса беретініне сенім білдірді.
Армен Саркисян өз кезегінде Қазақстанға жұмыс сапарымен келуге мүмкіндік жасағаны үшін Қасым-Жомарт Тоқаевқа алғыс айтты.
– Мен үшін Қазақстанға келу – белгілі бір мағынада өз үйіме, достарыма келгенмен бірдей. Өзіңіз айтқандай, біздің халықтарымыз арасындағы қарым-қатынастар өте жақсы және оның тарихи тамыры тереңде, – деді Армения Президенті.
Армен Саркисян Қасым-Жомарт Тоқаевтың Нұр-Султан мен Ереван арасындағы байланыстарды одан әрі кеңейтудің әлеуеті зор деген пікірімен келісті. Осы ретте ол сауда, білім беру, жаңа технологиялар, тамақ өнімдерін қайта өңдеу салалары бойынша жасалып жатқан қолайлы шарттарға назар аударып, аталған ынтымақтастықтың мазмұнын байытып, кеңейте беруге ниетті екенін жеткізді.
