Кейінгі жылдары елімізде мектепке дейінгі білім берумен қамту мәселесі біртіндеп жақсы жолға қойылды. Жабылып қалған бірталай бақшалар қайта жанданып, бүгінде олар балғын бүлдіршіндердің сыңғырлаған күлкісі мен қуанышты үндеріне толуда. Соңғы бес жылда біздің облысымызда да балалақшалар саны 13,6 пайызға көбейген.
Степногорск қаласында тәуелсіздік жылдары бүлдіршіндерге есігін айқара ашқан балабақшалар көп. Бүгінгі күні аталмыш өндірістік шаһарда мектепке дейінгі 20 білім беру мекемесі жұмыс істейді. Солардың бірі саналы ұрпақ тәрбиелеуді көздейтін «Балдырған» балабақшасы 250 орынға шақталған және қазіргі заман талабына сай құралдармен жабдықталған. Мұнда сапалы білім беруді мақсат тұтқан 24 педагог еңбек етіп, орыс және қазақ тілдеріндегі 10 топта болашақ тәрбиесімен айналысады. Сондай-ақ, бақшада балалардың жан-жақты дамуы үшін түрлі үйірмелер ашылған.
Жалпы, тәуелсіз елде алаңсыз өсіп келе жатқан ұрпақ үшін қаладағы мектепке дейінгі білім беру мекемелерінде барлық жағдай жасалыпты. Дәл қазір шаһарда 13 балабақша мен 7 шағын орталық бүлдіршіндерді тәрбиелеп, білім нәрімен сусындатуда.
– 2005 жылы балабақшаға жөндеу жұмыстары жүргізіліп, тапсырылды. Содан бері 16 жыл бойы балғындарды қабылдап келеміз. Педагогтар үнемі біліктілігі мен білімін арттырып, мектеп жасына дейінгі балалардың интеллектуалдық және шығармашылық дамуы жолында аянбай еңбек етіп келеді, –деді балабақша меңгерушісі Рауза Сапарова.
Бүлдіршіндер мен тәрбиешілер үнемі түрлі байқауларға қатысады. Биыл бұл балдырғандар мекені түрлі додаларда қатысып, 21 рет топ жарып, көптеген жарыстарда жеңімпаз атаныпты. Осылайша, балалар үшін барын жасап жатқан «Балдырған» ұжымы әлі де талай белестерді бағындыруды көздейді.
–Балаларға сапалы білім беруді қамтамасыз етудің басты шарты– олардың мектепке дейінгі және мектепалды білім алуы болып табылады. Білім бөлімінің жанында 20 мектепке дейінгі тәрбие және оқыту ұйымдары жұмыс істейді. Оның ішінде 9-ы мемлекеттік, 4-еуі жекеменшік және 7-еуі шағын орталық. Инклюзивті білім беру аясында жұмыс істейтін балабақшалар да бар. Сондай-ақ, барлық мекемелерде логопед-мамандар жұмыс істейді, –дейді қалалық білім бөлімінің әдіскері Әнел Кемелова.
Ырысалды ТӨЛЕГЕНҚЫЗЫ,
«Арқа ажарының» өз тілшісі.
