Шоқан Уәлиханов атындағы Көкшетау мемлекеттік университетінде «Қазақстан Республикасының 2015-2025 жылдарға арналған сыбайлас жемқорлыққа қарсы күрес стратегиясын жүзеге асырудың негізгі аспектілері» атты ғылыми практикалық конференция болып өтті.
Оның жұмысына Ш.Уәлиханов атындағы Көкшетау мемлекеттік университетінің профессорлық-оқытушы құрамы, магистранттар, докторанттар, жоғары оқу орындарының студенттері, күш құрылымдарының, мемлекеттік мекемелердің, қоғамдық ұйымдар мен БАҚ өкілдері қатысты. Жемқорлыққа қарсы күрес тақырыбында жоғары оқу орнының оқытушылары мен студенттері өкілдерінің қатысуымен конференция өткізудің астарында білім беру саласында белең алып кеткен замана дертінің алдын алу, оған қарсы күреске оқытушылармен бірге студенттерді де жұмылдыру мақсатының жатқандығы анық.
Конференцияда «Қазақстан Республикасының жемқорлыққа қарсы күрес жөніндегі заңдарының жекелеген аспектілері туралы» Ақмола облысы бо-йынша жемқорлыққа қарсы күрес департаментінің маманы Әділхан Тіржанов, «Сыбайлас жемқорлыққа қарсы күрестегі халықаралық тәжірибелер» жайында Ш.Уәлиханов атындағы Көкшетау мемлекеттік университетінің юриспруденция кафедрасының оқытушысы
Азамат Омаров, «Жемқорлыққа қарсы күрес –
баршаның ісі» деген тақырыпта «Жігер» жас мемлекеттік қызметшілер» клубының президенті Диана Сыздықова баяндама жасады.
Конференция қорытындысы бойынша қатысушылар студенттерге арнап жемқорлыққа қарсы ымырасыз болуға шақырған үндеу қабылдады.
Қалкөз ЖҮСІП
