Облыс әкiмi Сергей Кулагин жеке мәселелері бойынша тұрғындарды қабылдап, алдына үмітпен келген адамдардың тұрғын үй-коммуналдық шаруашылығы және әлеуметтік сала бағытындағы мәселелерінің шешілуіне назар аударды.
Қабылдауға алғашқы болып кірген облыс орталығының іргесіндегі Краснояр ауылының тұрғындары Бапан Кәкиев және Мәулида Омарова «Нұрлы жол» бағдарламасы шеңберінде пайдалануға берілген жаңа жылу қазандығы үшін өңір басшысына ауылдастары атынан алғыстарын білдірді. Сонымен қатар, облыс әкіміне бір орталықтандырылған жылу жүйелері жоқ тұрғын үйлерді осы қазандыққа қосуды сұрады.
Өңір басшысы бұл мәселе өз бақылауында екенін және оны шешу бағытында нақты жұмыстар қолға алынғанын айтып түсіндірді.
– Қазіргі кезде қала әкімдігімен жобалық-сметалық құжаттама әзірленіп жатыр. Осыдан кейін ғана магистралды желі анықталып, тұрғын үйлер қосылатын болады, – деді Сергей Кулагин.
Облыс әкімі қабылдауға келген барлық азаматтардың өтініш-тілектері мұқият ескеріліп, шешілетіндігін айта келе, әрбіреуін өз бақылауында ұстайтындығын атап өтті.
Облыс әкімінің баспасөз қызметі.
