Өнерлі жастар қаулап өсіп келеді. Талаптың тұлпарына мінген олардың алғашқы талпынысы үміт күттірерлік. Таяуда ғана «Көкшетау» мәдениет сарайында өткен «Өнерге қанат қаққандар» атты кеш салтанатынан көрермен осындай ой түйді.
Кештің көрермендері де аз болған жоқ. Себебі, бұл кештің ерекшелігі – өнер өлкесіне енді қадам басып жатқан жас өрендердің қатысуында еді. Республикалық, халықаралық байқауларда көрініп жүрген әншілер мен бишілер де өнер көрсетті. Кештің шымылдығын «Көкшетау» халықтық би ансамблі ашып, бірден көрермендердің ықыласына бөленді. Сондай-ақ, концерт барысында әуезді әндер шырқалып, күмбірлі күйлер шалқыды. Өнерпаздар армян, орыс, моңғол халықтарының ұлттық билерін билеп, әндерін де әуелетті. Кешті одан сайын жаңдандыра түскен «Он алты қыз» халықтық би ансамблінің «Сүйінші» биі еді. Себебі, осы би арқылы биші қыздар қазақ халқының салт-дәстүрлерін әдемі көрсете білді. Өнер – жұтамайтын азық, таусылмайтын байлық. Ал, тәңірдің берген дарынын жасырып қалмай, оны қалың көпшілікке көрсете білу де өнер. Мәселен, «Жұлдыз» вокал студиясының әншілері «Тек алға» әнін орындап, талғамы биік тыңдарманының көңілдерінен шықты.
Кештің соңында барлық өнерпаздар «Бір үйдің баласындай» әнін орындап, ұлттар мен ұлыстар ынтымақ пен бірлікті нығайтып, бір үйдің баласындай ғұмыр кешіп жатқандығын паш етті.
Назгүл РАБИЛОВА.
Суретті түсірген Берік ЕСКЕНОВ.
