Ақмола облысының әкімі Марат Ахметжанов жұмыс сапарымен Зеренді ауданында болып, тұрғындармен есеп беру кездесуін өткізді және пәтерлердің кілттерін тапсырды.
Өңір басшысы ауданның өнеркәсіптік әлеуетіне ерекше назар аударды. Ауданның облыстың жалпы өнеркәсіптік өндірісіне қосқан үлесі «Altyntau Kokshetau» АҚ ірі алтын өндіруші фабрикасының жұмысының арқасында 24,8 пайызды құрайды. Алайда, осы кәсіпорынды есепке алмағанда ауданның үлесі небәрі 2 пайызға дейін төмендейді. Бұл өнеркәсіпті әртараптандыру жөнінде шаралар қабылдауды талап етеді.
Атап айтқанда, әкім сусындар, косметика, парфюмерия және отын өндірісі сияқты салаларда пайдаланылуы мүмкін этил спирті өндірісін дамытудың маңыздылығын атап өтті, бұл экономикалық өсу үшін жаңа мүмкіндіктер туғызады.
Аудан агроөнеркәсіп кешенінде жоғары көрсеткіштерге ие. Биыл дәнді дақылдардың өнімділігі гектарына 21 центнерді құрады, бұл – былтырғы нәтижеден 2,3 есе жоғары.
– Саланы одан әрі дамыту үшін аграршыларға өсімдік шаруашылығын әртараптандыру шараларын белсенді қолға алу, майлы және жемшөп дақылдарының алқаптарын ұлғайту, сондай-ақ, жаңа технологияларды енгізуді қажет, – деп атап өтті Марат Ахметжанов.
Бұдан басқа, ауданда мал шаруашылығы дамуда, ірі бордақылау алаңдары мен фермалар жұмыс істейді, ал алдағы екі жылда 400 басқа арналған сүт-тауар фермасын іске қосу жоспарлануда.
Инвестициялық тартымдылықты арттыру үшін өңір басшысы тамақ өнеркәсібін, құрылыс индустриясын дамытуға, сондай-ақ кірпіш пен керамикалық плиткалар өндірісін ұйымдастыруға баса назар аударуды тапсырды. Сондай-ақ, қолда бар инфрақұрылымдық мүмкіндіктерді ескере отырып, Қарағай станциясында индустриялық аймақ құру бастамасы айтылды.
Талқылаудың тағы бір негізгі бағыты туризм саласы болды. «Көкшетау» мемлекеттік ұлттық табиғи паркінің аумағында орналасқан Зеренді курорттық аймағы орасан зор әлеуетке ие, алайда жыл сайынғы туристік ағын әзірге 30 мың адам деңгейінде қалып отыр. Әкім инвесторларды тарту, инфрақұрылымдық жобаларды іске асыру және кәдесыйлар мен жергілікті деликатестерді қоса алғанда, туристер үшін өнім шығаратын кәсіпорындарды қолдау қажеттігін атап өтті.
Марат Ахметжанов ауыл тұрғындарының өмірін жақсартуға және табысын арттыруға бағытталған мемлекеттік қолдаудың рөліне ерекше тоқталды. «Ауыл аманаты», «Кең дала», «Дипломмен ауылға» және т.б. бағдарламалар шеңберінде қаржыландыру мәселесіне көңіл бөлу тапсырылды.
Денсаулық сақтау саласында оң өзгерістер байқалады. Сондай-ақ, кездесу барысында тұрғын үй және жол құрылысы, ТКШ, білім беру және басқа да салалардың өзекті мәселелері қаралды.
– Аудан өзін-өзі қамтамасыз етеді, өз кірістерінің есебінен жергілікті шығындарды жабуға қауқарлы. Алайда, облыстық бюджетке тәуелділік сақталуда. Аудан басшысы бюджеттің кіріс бөлігін жақсарту бойынша жұмыс істеуі қажет, бұл көптеген әлеуметтік және инфрақұрылымдық мәселелерді шешуге мүмкіндік береді, – деп қорытындылады М.Ахметжанов.
Кездесу соңында «Ақмола – еңбек озаты» төсбелгісімен, ақшалай сертификаттармен, «Сағадат Нұрмағанбетовке 100 жыл» медалімен, облыс әкімінің Алғыс хаттарымен ауданның әлеуметтік-экономикалық дамуына үлес қосқан бірқатар тұрғындар марапатталды.
Аудан тұрғындарын жеке қабылдау кезінде зеренділіктер облыс әкімінің алдында тұрғын үй, жер, жол жөндеу және басқа да мәселелерді көтерді.
Бұдан кейін жаңа пәтерлердің кілттерін тапсыру рәсімі болып өтті. етті. Іс-шара тұрғын үй құрылысын дамытудың және халықтың әлеуметтік осал топтарын қолдаудың мемлекеттік бағдарламасы шеңберінде жүзеге асты. Аудан әкімдігі тұрғын үй жағдайын жақсартуға мұқтаж отбасылар үшін жеті пәтер сатып алды. Пәтерлер абаттандырылған тұрғын үйде орналасқан және әрқайсысының ауданы 84 шаршы метрді құрайды. Жаңа қоныстанушылар арасында бес баланың анасы Самал Мәдимұханбетованың да отбасы бар.
– Біздің отбасымыз үшін бұл қуанышты және маңызды оқиға. Көмек көрсеткені, өмір сүруге қолайлы жағдай жасағаны үшін мемлекетімізге алғыс айтамыз, – деді зеренділік тұрғын.
Сол күні ауданға жаңа мамандандырылған техника берілді. Олардың арасында жедел медициналық жәрдем, аударғыш жүк көлігі, ассенизатор машинасы, шағын автобус және тағы басқа көлік түрлері бар.
Автопаркті жаңарту коммуналдық қызметтер жұмысының тиімділігін арттыруға және халыққа көрсетілетін қызметтердің сапасын жақсартуға бағытталған.
Өңір басшысы бұл шара ауданда өмір сүру сапасын едәуір арттыруға және қызметтердің жұмыс істеуі үшін қолайлы жағдай жасауға мүмкіндік беретінін атап өтті.
Заманауи жедел жәрдем көліктері әсіресе, шалғайдағы елді мекендерден шақырту түскен кездегі медициналық қызмет көрсету уақытын едәуір қысқартады.
«В» және «С» класты автомобильдер шұғыл медициналық көмек көрсету үшін толық жабдықталған. Олар өкпені жасанды желдетудің портативті аппаратымен, көлік дефибриллятор-мониторымен, реанимациялық жинақпен, электрокардиографпен, сондай-ақ, реанимациялық-анестезиологиялық мақсаттағы монитормен жабдықталған. Бұл жабдық пациенттерге ең қиын жағдайларда да көмек көрсетуге мүмкіндік береді, – деді облыстық денсаулық сақтау басқармасының басшысы Нұрлан Ахильбеков.
Ақмола облысы әкімінің баспасөз қызметі.
Зеренді ауданы.