Қатерлі мал ауруы ошағы жойылды

Ақмола облысының әкімі Ермек Маржықпаевтың төрағалығымен өткен кезекті аппарат кеңесінде Аршалы ауданының Ольгинка селосында ірі қара малдың сібір жарасы ауруының орын алуына байланысты қолданылып жатқан шұғыл шаралар, басқа да өзекті мәселелер қаралды.

Бұл жағдай алғашқы күннен бастап облыс басшысының тікелей бақылауына алынып, аудан аумағындағы ауру ошағын жою жөніндегі жедел штаб құрылған болатын. Жергілікті жерде ветеринарлық, медициналық және санитарлық қызмет мамандарынан құралған жұмыс тобы ауруға қарсы шараларды жүргізуде. Қазіргі күні қауіпті дерт ошағы залалсыздандырылып, аурудың таралу қаупі жойылды.
Ольгинка селосының бес тұрғыны ауруханаға жатқызылса, олардың екеуінің дерт жұққызбағаны анықталып отыр. Ауруханаға түскендердің бәрі дәрігердің бақылауында ем алып жатыр, жағдайлары бірқалыпты. Ауру жұқтырған азаматтар сойған екі ірі қараның еті жойылды.
Осы оқиғаға байланысты карантин жарияланғаны белгілі. Ольгинка селосына кіре беріске тәулік бойы жұмыс жасайтын карантиндік қосын орнатылып, жұмыс істеуде. Ауыл аумағындағы барлық тұрғындардың малдары тексеріліп жатыр. Сауықтыру шараларын жүргізу мақсатында Нұр-Сұлтан қаласынан «Республикалық мал ауруларына қарсы топ» республикалық мемлекеттік мекемесінің мамандары келіп, жұмыс істеуде.
Аппарат кеңесінде сондай-ақ, мемлекеттік сатып алу, егін орағы науқанын өткізу, жылу беру маусымына дайындық, әлеуметтік маңызы бар нысандарды салу және жөндеу жұмыстары, басқа да мәселелер қаралып, салалық қызмет басшыларына тиісті тапсырмалар берілді.

Пікір қалдыру

Міндетті өрістер таңбаланған Обязательные поля помечены *