Ұлы Жеңістің 70 жылдығы қарсаңында Викторовка селосында аудан әкімі Асқар Мұратұлының қатысуымен майданда шейіт болған жауынгер Михаил Асафовтың мәйітін жерлеу рәсімі өтті.
Жауынгердің мәйітін Ресейдің Санкт-Петербург қаласынан оның туған жиені, «Викторовка» серіктестігінің басшысы Владимир Андрюхин алып келген. Майдангерді жерлеу рәсіміне аудан әкімімен бірге аудандық мәслихат хатшысы Қайрат Ауғалиев, облыстық қорғаныс істері жөніндегі департаменттің басшылары мен дін өкілдері және марқұмның туған-туыстары қатысты.
Михаил Григорьевич Асафов Зеренді ауданының тумасы, 1914 жылы дүниеге келген. 1941 жылы Молотов аудандық әскери комиссариаты әскер қатарына шақырып, майданға жіберілген. 210-шы атқыштар дивизиясының мотоатқыштар ротасында басқыншы жаумен соғысып жүрген кезінде қаза тапқан.
Жауынгердің сүйегін Валентина Боброва жетекшілік ететін «Жылубетон экспедициясы» іздестіру отряды Жылубетон теміржол платформасының маңынан тапқан. Ұлы Жеңістің 70 жылдығына орай 8-ші мамыр күні Михаил Асафовтың қаза болған жерінде мемориалдық тақта ашылып, салтанатты шара өтті.
Зеренді ауданы.
