Қасиетті Рамазан айының оразасын ұстап, ауыз бекіткен ағайын дініміздегі осы бір парыздық міндеттерін адал атқарып, мол ғибадатқа бөленуде. Өздерінің ақыреттегі өміріне лайық тағылымды сауаптар жасап, оразаның да осындай ғибраты бар екеніне қаныға түседі. Ал, Рамазан айындағы Қадір түнінің қасиеті де өте зор.
Қадір түні арабшадан аударғанда адамдардың тағдырын белгілейтін түн деген ұғымды білдіреді. Бұл қасиетті Нұр тауының үңгірінде Пайғамбарымызға алғашқы Құран аяттары түсе бастаған түн еді. Сондықтан, бұл түн адамзат баласына Алланың рахметі жа-уатын, қараңғылықтан тазартып, жақсылыққа бастайтын қасиетті рәсім саналады. Оның қасиетті Құранда да мың айдан артық екені айтылады. Олай болса, Қадір түніндегі әрбір жасаған құлшылығымыз 83 жыл ғибадаты бар сауапқа ие екен.
Бір хадистерде: «Қадір түні жерге түсетін періштелердің саны жер бетіндегі майда тас-тардан да көп болады» делінеді. Әрбір адам осы түні өз тілек-ниетінің қабыл болуы үшін дұға тілеп өткізгені абзал. Себебі, ол келер жылы болатын әрбір істің тағдырын шешетін мүбәрәк түн. Осы түні әрбір мұсылман баласы Алла тағалаға құлшылық жасап, көп дұға тілегені тағылымды болады. Мысалы, Әбу Хурайра риуаят етілген пайғамбарымыздың (с.ғ.с.) бір хадисінде Қадір түнінде сауапқа батамын деп берік иманмен түнгі намазын оқыған адамның күнәлары кешірілетіні айтылады. Сол себепті осы тағылымды кеште Аллаға сыйынып, сәждеге бас қойған пенде рухани жағынан да тазарып, мол сауапқа кенеледі.
Барша мұсылман қауымы!
Сіздерді осынау қасиетті Рамазан айының Қадір түнімен шын жүрегімнен құттықтап, ізгі ниетімді білдіргім келеді. Қадір түні әрбір адам өзінің тілеген тілегіне жетіп, мол сауапқа кенелуіне тілектестігімді білдіремін. Біздер осы ғибратты істеріміз арқылы ақырет күнінің де қамын ойлап, дұғаларымызды оқып, құлшылықтарымызды жасасақ, рухани жағымыздан да, имани тұрғыдан да сау адамдай сауығып, тазаратынымыз анық. Сондықтан, сіздерге қасиетті Қадір түні мол жақсылықтар мен ырыс-береке әкелсін деп тілеймін. Ниетімізді қабыл етсін!
Қанат ҚЫДЫРМИН,
Қазақстан мұсылмандары діни басқармасының Ақмола облысындағы өкіл имамы, Науан хазірет атындағы Көкшетау орталық мешітінің бас имамы.
