Күні кеше елімізде теңге бағамына қатысты өзгерістер болғаны баршаға мәлім. Осы мәселенің ел арасында да екіұдай пікір тудырып жатқаны белгілі.
Алайда, менің айтпағым, мемлекетіміз әлем елдерімен қарым-қатынаста болғаннан кейін экономика, басқа да салаларға оның әсері тимей қоймайды. Ұлттық валютамыз теңгені еркін айналымға жіберуге мәжбүр болғанымыз сондықтан.
Мемлекет басшысы бұл жөнінде: «Барлық мүмкіндікті қарастыра отырып, теңгенің еркін айналымдағы бағамын енгізу және инфляциялық таргеттеуге өту ең дұрысы болып отыр. Турасын айту керек, бұл қадамға баруға мәжбүр болдық, бүгінде мұның өзге баламасы жоқ», – деген болатын.
Яғни, ешқандай шараны қолға алмасақ, елде өндіріс көлемі төмендеп, жұмыс орындары қысқарып, валютамыз, яғни, қорымыз «күйіп кетер» еді. Мінеки, еліміздің алтын-валюта қоры таусылып, мемлекет құрдымға кетпес үшін Президент осындай шешімге келді.
Ең бастысы, бұл іс-әрекетіміз еліміздің дамуына оң ықпал етіп, жаһанды жайлаған дағдарыс заманында халықтың әл-ауқатының әлсіреп қалмауына септессе игі.
Нұрлан ШАЛҒЫМБАЕВ,
Қорғалжын аудандық балалар шығармашылық үйінің директоры,
«Нұр Отан» партиясының мүшесі.
