Кезінде Целиноград облысының «Еркіншілік» кеңшарында осы шаруашылықтың директоры Андрей Риммердің шаруақорлығының арқасында 300-ден аса түйе өсіріле бастаған болатын.
1970-1980 жылдары Қорғалжында және Целиноград қаласында түйе ұстаған адамдар болғаны есімізде. Олар өз түйелерін кейін Наурыз секілді мейрамдарда жалға беріп, халықты қызыққа батыратын.
Экономикамыз өсіп, мемлекетіміз нығайған осы заманда Ауыл шаруашылығы министрі Асылжан Мамытбеков мырза осы істі қолға алуға бастамашы болса, нұр үстіне нұр болары анық. Солтүстіктің, әсіресе, Қорғалжын, Ерейментау аудандарының табиғаты мен жер ыңғайы түйе түлігін көптеп өсіруге қолайлы. Осынау жануардың бағым-күтімін жақсы білетін Монғолиядан қоныс аударған ағайындарымыз да бар. Соларға «Сыбаға» немесе «Агрокредит» арқылы жеңілдікпен несиелер берілсе, іс оңға басып кетер еді. Министрлікте, аймақтар мен облыстарда да мұны ойлайтын мамандар бар шығар. Бұрын өңірімізде түйе көп болған ғой.
Смағұл РАХЫМБЕК,
жазушы.
Астана қаласы.
