Премьер-Лиганың төртінші турында «Оқжетпес» Оралда «Ақжайық» клубымен кездесті. Бұған дейін екі команданың қоржынында бір-бір жеңістен бар еді.
Әсіресе, 2:1 есебімен өз алаңында Алматының «Қайратын» ұтқан оралдықтарға бұл жеңіс психологиялық жағынан көп басымдылық бергені анық. Дегенмен, екі команда да бұл күні жеңіске ұмтылып бақты. 35 жасқа толған «Оқжетпестің» капитаны Әлібек Бөлешев те (№10) өзінің туған күніне кезекті голымен жақсы сый жасағасы келгені даусыз. Қуанышқа орай, бұл оның қолынан келді. Ойынның 25-інші минутында Марат Хайруллиннің бұрыштамадан соққан добын Әлібек қақпаға баспен дәл түсірді. Үзіліске осы есеппен тарқасқан қос команда екінші кезеңде де алма-кезек шабуылдармен басымдық алғысы келді. Бірақ, «Оқжетпестің» жолы болып, негізгі 90 минутқа қосылған қосымша уақытта сербтік жартылай қорғаушымыз Ристо Ристович допты қақпаның бұрышына тура бағыттады. Сөйтіп, оқжетпестіктер 2:0 есебімен «Ақжайықты» да тізе бүктіріп, турнир кестесінде жоғарылай түсті.
Бет қатталып жатқанда жерлестеріміз біріншіліктің тағы бір ойынын өткізіп, Астана-Арена стадионында «Атырауды» қабылдады. Есеп 2:0. Бұл жолы да ойын «Оқжетпестің» пайдасында.
«Арқа ажарының» өз ақпараты.
