Қазіргі таңда елде қалыптасып отырған жағдай халық қалаулысы ретінде мені де толғандырады. Қарапайым халық бізге сенім артып, сайлағаннан кейін елдің сөзін сөйлеп, мұңын мұңдау біздің міндетіміз.
Күні кеше Мемлекет басшысы Нұрсұлтан Назарбаевтың Жер кодексінің даулы баптарының күшін уақытша тоқтатқанын ел қызу қолдап отыр.
Президентіміз алдымен бұл мәселені зерттеп, халыққа түсіндіріп, Парламентпен бірге талқылап барып, бірегей шешім қабылдау қажеттігін айтты. Қашанда елдің пікірін ескеріп, халқының сөзіне құлақ түретін Көшбасшымыз бұл жолы да өте парасатты шешім қабылдады.
Әрине, жердің иесі болғаны дұрыс. Енді соны өзгелері де жақсылап түсініп, ертеңгі күні қарапайым халықтың жерсіз қалмауына жағдай жасауы қажет. Жалпы, жерді сатуда бір тетік болғаны дұрыс. Ауылдағы ағайынға екінші деңгейлі банктер төмен пайыздармен несие берсе, кәсібін өркендетсе, одан артық еш нәрсенің керегі жоқ. Бүгінгі күні ауылдағылар тек малмен ғана күндерін көріп отырғаны жасырын емес. Қолдарында бар байлық тек жер ғана.
Ауылға жиі барып, ақсақалдармен сөйлесіп жүремін. Ешкім де тәуелсіз елімізде қандай да бір бүлік, дау-дамайдың шыққанын қаламайды. Бәріміз жер туралы мәселе ақылмен шешіледі деген үміттеміз. Әрі солай боларына Елбасының кешегі нұсқауы айқын дәлел.
Әлібек БАЙМАҒАМБЕТОВ,
мемлекеттік қызметшілерді қайта даярлау және біліктілігін арттыру жөніндегі аймақтық орталықтың директоры, облыстық мәслихаттың депутаты.
