Бүгінгі күнді жарнамасыз елестету мүмкін емес. Әсіресе, үлкен елді мекендерде, қалалардағы жарнамалар қадам басқан сайын көз жауын алады. Сол жарнамалардың мемлекеттік тілде жазылған мәтіндерінде стилистикалық және грамматикалық қателердің жиі кездесетіні жасырын емес.
Қазақстан Республикасы «Тілдер туралы» заңының 21-бабында бланкілер, мекеме маңдайшалары, хабарландырулар, жарнамалар, баға тізбесі, басқа да көрнекті ақпараттар мемлекеттік және орыс тілдерінде жазылады деп көрсетілген. Дегенмен, заңның осы талабын орындамайтындар қай жерде де кездесіп жатады. Мұндай қателер облыс орталығы Көкшетау қаласында да жиі ұшырасады. Биылғы жылдың қаңтар айында осыған байланысты қалалық мәдениет және тілдерді дамыту бөлімі қалада кәсіпкерлік саласында «Тілдер туралы» заңның орындалу жайына арналған семинар өткізген болатын. Онда кәсіпкерлердің назарын осы мәселеге
аударып, заң бұзушылықтарға жол бермеу тапсырылған еді.
Содан бері бірнеше ай өтсе де семинарда көтерілген мәселеге жеткілікті мән бермей жүрген жекеменшік мекемелер аз емес. Қалада кәсіпорын немесе мекеме маңдайшасына бір ғана тілде, яғни, орыс тілінде жазылған мекеме атаулары көп кездеседі. Ал, маңдайшаға қазақ тілінде жазатындардың арасында грамматикалық қателер жиі көзге шалынады. Осы орайда, қарапайым тұрғындар тарапынан кейде орынды сын-ескертпелер туындап жатады. Сондықтан, қалалық мәдениет және тілдерді дамыту бөлімі кәсіпкерлердің назарын заңда қарастырылған шеңберде жауапкершілікке тартылатындарына
аударып, мұндай олқылыққа жол бермеуге шақырады.
Гүлназ БАЙМАҒАМБЕТОВА,
Көкшетау қалалық мәдениет және
тілдерді дамыту бөлімінің бас маманы.
