Бір топ бала Қопа көлінің жиегінде жатқан, қолдан жасалған салды тауып алып, көл бетіне шыққан. Күн желді, дауылды болатын. Әне-міне дегенше жасанды сал ығып, көлдің ортасына да жетіп қалған. Қауіпті кеш аңғарған балалар жағалауға қарай жүзбекші болып тырысқанымен, әрекеттерінен еш нәтиже шықпаған.
Әбден қалжыраған балалар жел өтінде жаурап, тоңған, көмекке шақырайын десе, бәрінің ұялы телефондары жағалауда қалыпты. Балалардың бірі салға қатарластыра байланған ағаш бөшкеге жармасып, жағалауға қарай жүзуге әрекеттенеді. «Суға кеткен тал қармайды» дейді емес пе, бар үміт ағаш бөшкеде болғанымен, бұл жанталаса қимылдаған әрекеттен де ештеңе шықпаған.
Міне, дәл осы сәтте жедел құтқару жасағының бас құтқарушысы Р.Шевченко дүрбімен көл айдынына шолу жасап тұрғанда дәл ортада қолдарын бұлғап, көмекке шақырып тұрған балаларды байқап қалған. Жедел жеткен құтқарушылар алдымен бөшкеге жармасып, жүзіп жүрген баланы қайыққа отырғызып алып, кейін жасанды салдың үстіндегі балаларға жеткен. Дереу көмек көрсетілген. Зәрелері ұшқан, жел өтінде тоңып қалған оларды жылы көрпеге орап, ыстық шәй бергеннен кейін, киім-кешектерін тастаған жерге жеткізген.
Осы бір оқыс оқиға кезінде құтқару жұмыстарының жедел әрі сауатты ұйымдастырылуына жасақ басшысы Дәулет Шамиғанов ұйытқы болды. Сөйтіп, жедел іс-қимылдың арқасында балалар анық ажалдан аман қалды.
Оралбек МҰҚАШЕВ,
Ақмола облысы төтенше жағдайлар департаменті жедел құтқару жасағының бас инспекторы.
