Облыс әкімі Сергей Кулагин Конституция күні қарсаңында Көкшетаудағы «Көктем» шағын ауданында жаңадан салынған 280 орындық балабақшаның ашылу салтанатына қатысып, бүлдіршіндер мен ата-аналардың қуанышына ортақтасты.
Соңғы жылдары Мемлекет басшысы Нұрсұлтан Назарбаевтың тапсырмасына орай, қолға алынған мемлекеттік бағдарламалар облыс аумағында мұқият жүзеге асырылып келеді. Әсіресе, Конс-титуция күні мерекесі қарсаңында білім ордаларын пайдалануға беру игі дәстүрге айналған. Биыл да оң үрдіс жалғасын тауып отыр. Оған Көкшетау қаласындағы «Көктем» шағын ауданында 280 орындық балабақшаның пайдалануға берілуі айқын дәлел. 
Мектепке дейінгі білім беру нысаны «Нұрлы жол» бағдарламасы аясында салынған. Оның құрылысына республикалық бюджеттен 678 миллион теңге қаржы жұмсалған. Салтанатты шараға қатысқан облыс əкімі Сергей Кулагин бұл жақсылықтардың барлығы Елбасымыздың тікелей нұсқауымен қабылданған мемлекеттік бағдарламалардың арқасында екендігін айта келе, бүлдіршіндер мен олардың ата-аналарын қуаныштарымен құттықтады. Одан әрі осы балабақшаның тәрбиеленушілері Жанерке Төлегенова мен Амантай Алпамыс жаңа ғимараттың лентасын қиды. Жиналған қауым ішке еніп, балғындардың жатқа оқыған өлеңдері мен әсем әндеріне құлақ түрді. Өз кезегінде ата-аналар атынан сөз сөйлеген қала тұрғыны Гаухар Әбдірахманова ризашылық сезімін білдірді. Жалпы, жыл аяғына дейін облыс орталығында 240 орындық тағы бір балабақша ғимараты пайдалануға берілмек. Оған өңірде әлеуметтік саланың дамуына бизнес құрылымдары да үлес қосуда. Осы күндері мемлекеттік-жекеменшік серіктестік аясында облыс бойынша барлығы 7 мың орындық 68 мектепке дейінгі білім беру мекемесі пайдалануға беріліп отыр.
Аслан ОСПАНОВ.
Суреттерді түсірген Берік ЕСКЕНОВ.
