Облыстық филармонияда жас отбасылар арасында ұйымдастырылған «Тәуелсіздік –тірегім, отбасым – жүрегім» атты сурет байқауы мәреге жетті. Егемендігіміздің 25 жылдығына және отбасы күніне орай, аталмыш байқауды облыстық жастар ресурстық орталығы ұйымдастырды.
Байқаудың мақсаты – жастар арасында отбасылық құндылықтарды насихаттау. Сайыс бірнеше кезеңнен тұрды. Ең алдымен байқауға қатысуға ниет білдірген отбасылардың суреттері қабылданды. Содан соң, «В контакте» әлеуметтік желісіндегі облыстық жастар ресурстық орталығының парақшасында олардың суреттері жарияланды. Дауыс беру кезеңінің қорытындысы
бойынша ең көп «дауыс» жинаған үздік он отбасы екінші кезеңге өтті. Ал, екінші кезеңге жолдама алған жанұялар өз өмірлерінен алынған екі шағын суреттерін жіберіп, қазылар шешімімен облыстық байқауға бес жанұя қатысты. Бұл жерде қатысушылар «Менің жанұям – менің байлығым» тақырыбында бейнероликтерін көрсетіп, жас отбасылар өмірлерінің ең жарқын көріністерін паш етті. Олар отбасы – шағын мемлекет деген идеяны алға тартты. Ал, байқаудың ең шешуші кезеңінде жас отбасылар шығармашылық қабілеттерін ортаға салып, әуезді әндерімен және әсем билерімен көрермендерге жақсы көңіл-күй сыйлады.
Қорытынды кезең бойынша Есіл ауданынан келген Жанар мен Айбар Бөрібаевтар жанұясы байқаудың жеңімпаздары атанса, екінші орынды Егіндікөл ауданының намысын қорғаған Айтуған және Айдана Жұматовтардың отбасы жеңіп алды. Ал, үшінші орынды Аршалы ауданынан келген Юлия және Данияр Өтеевтер жанұясы иеленді. Облыстық жастар ресурстық орталығының басшысы Тимур Ысқақов аталмыш сайысқа белсене қатысқан отбасыларға алғысын білдірсе, облыстық мәслихаттың депутаты Әлібек Баймағамбетов отбасының іргетасы мықты болған жағдайда, еліміз де өркендей беретінін жеткізді. Байқау қатысушыларына дипломдар мен бағалы сыйлықтар табыс етілді.
Назгүл РАБИЛОВА.
Суретті түсірген Берік Ескенов.
