2017 жылдың 20 шілдесінде Ақмола облысы Целиноград аудандық прокуратурасының ғимаратының алдында құқық қорғау органдарының қызметкерлеріне оқ атылды.
Облыстық прокуратура өкілдері осы оқиғаға байланысты жаңа деректерді жария етті. Прокуратура қызметкері Ж.Әлібаев пен Целиноград аудандық ішкі істер бөлімінің тергеушісі А.Пішембаевқа оқ атқан О. Жампозов кезінде Қазақстан Республикасы Ауыл шаруашылығы министрлігі Су ресурстары комитетінің «Қазсушар» шаруашылық жүргізу құқығындағы республикалық мемлекеттік кәсіпорнында бас директор болып қызмет атқарған. Кейін оған лауазымды тұлғалармен және мердігерлермен алдын ала келісім бойынша Преображенское су торабын жаңартуға бөлінген қаржыны өз қажетіне жаратты деген айып тағылған. Оқиға болған күні осы іске қатысты соттың шешімі шығуы тиіс екен.
Алайда, О.Жампозов мұны күтпей, түс кезінде жоғарыда аттары аталған қызметкерлерге қару қолданып, олар жараланған күйінде Астана қалалық ауруханасына жеткізіледі. Ал, осындай ауыр қадамға барушының өзі болса,
АЛЖИР құрбандарына орнатылған мемориалдық кешенінің аумағында өз-өзіне қолындағы қарудан оқ атып, суицид жасайды. Оның өлі денесін тапқан құқық қорғау органдары осындай қорытындыға келіп отыр. Қазір бұл істі бақылау Астана қалалық прокуратурасына тапсырылған.
«Арқа ажарының» өз ақпараты.
