Жасы сексеннен асқан зейнеткер пәтерінің есігін біреу қағып тұрғанын естиді.
Есіктің әр жағындағы азаматтан кім екенін сұрайды. Әлгі жігіт әлеуметтік қызметтен келгендігін айтып, зейнеткердің пәтеріне кіреді. Хал-жайды сұрап болған соң, әлгі жігіт зейнеткерге Астана күні мерекесіне орай, зейнеткерлерге мемлекеттен 11 мың теңге мөлшерінде сыйақы берілгенін хабарлап, оған 20 мың теңгені ұсынады. Қартайған шақта бір адамның өзіне көңіл бөліп, мерекемен құттықтай келгеніне әбден қуанған әжей әлгі жігітке 9 мың теңгесін қайтарып береді.
–Күнімен зейнеткерлердің есігін қағып, сыйақыларын үлестіріп жүрмін, бір кесе су беріңізші, – деп «әлеуметтік қызметші» әлгі әжейден су сұрайды. Зейнеткердің ас бөлмеге суға кеткен сәтін пайдаланып, оның сөмкесіндегі тірнектеп жинап жүрген 90 мың теңге мөлшеріндегі бар қаражатын үптеп кетеді.
Барлық жайды кейін түсінген әжей құқық қорғау органдарына хабарласып, болған жайды айтып береді. Алаяқ жігіттің берген 20 мың теңгесі кәдесыйлық купюра болып шығады.
Қазіргі уақытта полицейлер тарапынан күдіктіні анықтау және ұстау бойынша кешенді жедел-іздестіру шаралары жүргізілуде.
Облыстық ішкі істер департаментінің қызметкерлері осындай алаяқтардың құрығына түсіп қалмау үшін пәтерлеріңіздің есігін қаққан кез келген қызмет өкілдерін ішке енгізбес бұрын ең алдымен, олардың қызметтік немесе жеке куәліктерін сұрап, сол қызметке хабарласып, осындай адамның сонда жұмыс істейтіндігін анықтап алу қажеттігін ескертеді.
