Бұдан бұрын хабарлағанымыздай, Ақмола облысының жерімен де өткен Ресей–Қазақстан–Қытай бағытындағы «Жібек жолы-2017» халықаралық жарысы аяқталып, ралли-марафонына қатысушылар салтанатты түрде мәре сызығын қиып өтті. Бәсекеге қатысушылар 9599 шақырым қашықтықты еңсерді.
Салтанатты шарада Қытай Халық Республикасы мен Ресей Федерациясының лауазымды тұлғалары сөз сөйлеп, жарысты ұйымдастырушыларға зор алғысын білдірді.
Екі аптаға созылған қызу додада әртүрлі модификациялы, HILLIX, IVECO, TATRA, МАЗ маркалы жеңіл және жүк көліктері жарысты. Бірден айта кетсек абзал, Аstana Motorsports командасының намысын қорғайтын Артур Ардавичус «Ивеко» автомобилімен ралли-марафонды жүк көліктері есебінде төртінші болып аяқтады. Оның алдын «Камаз-Мастер» өкілдері орап кетті. – Биылғы жарыс өте тартысты өтті. Жүлдегерлер қатарынан көріну оңай болмады. Себебі, қарсыластарымыз кіл мықтылар. Алдымызды ораған КамАЗ жүк көлігі екендігін ескерсек нәтижеміз жаман емес деп есептеймін. Жарыста өз күш-жігерімізді аямай барынша жеңіс тұғырынан көрінуге тырыстық,–дейді Артурдың өзі. Жалпы, жарыс жолына 21 жүк көлігі шыққан. Алайда, мәре сызығына 16 экипаж ғана жете алды.
«Арқа ажарының» өз ақпараты.
Суретте: додалы жарысқа қатысқан астаналық команда мүшелері.
