Облыс әкімі Мәлік Мырзалин республикалық «Казахстанская правда» газетінің меншікті тілшісін мерейтойымен құттықтады.
Кеше облыс әкімі жетпіс жасқа толған Александр Кузенныйды мерейтойымен құттықтады. Өңір басшысы той иесіне жылы лебізін білдіріп, ізгі тілегін жолдады.
– Ұзақ жыл баспасөз саласында абыройлы қызмет еткен журналистердің арасында сіздің орныңыз бөлек. Ұзақ жылдар бойы мол тәжірибе жинаған, журналистиканың жампозы атанған жансыз. «Казахстанская правда» газетінің меншікті тілшісі бола жүріп, сіз өңіріміздің әлеуметтік-экономикалық табысы туралы шынайы жазып, мемлекеттік саясаттың басым бағыттары қаншалықты жүзеге асып жатқандығын айқын әрі анық көрсетіп келесіз,–деді облыс әкімі. Александр Кузенный өзінің еңбек жолын бұрынғы Целиноград телевидениесінің Көкшетау облыстық тілшілер қосынының редакторы болып бастаған. Кейін көптеген аймақтық және республикалық бұқаралық ақпарат құралдарында қызмет етті. Жазу өнерін жан серігі санайтын әрпітесіміздің қолынан әлі күнге дейін қалам түскен жоқ. Ол Ақмола өңірі журналистерінің алдыңғы легінде.
«Арқа ажарының» өз ақпараты.
