Ақмола облыстық сотында соттармен өзара іс-қимыл жөніндегі кеңес жұмыс істейді. Отставкадағы судья Темірхан Қасымов жетекшілік ететін бұл кеңес кеңесуші орган болып табылады және өз жұмысын қоғамдық негізде жүргізеді.
Кеңестің Қазақстан Республикасы Жоғарғы сот Кеңесінің шешімімен бекітілген өз ережесі бар. Жеті адамнан тұратын кеңес мүшелері өздерінің отырыс-тарында судья лауазымынан үміткерлердің іскерлік және моральдық-адамгершілік қасиеттеріне баға беріп отырады.
Жуырда соттармен өзара іс-қимыл жөніндегі осы кеңестің мәжілісі болып өтті. Мәжіліс алдында облыстық соттың төрағасы Досжан Әміров кеңес мүшелерімен кездесіп, өзі басқаратын соттың жұмысы, сот жүйесін реформалау, соттарда әділеттілік принципін орнықтыру бағытында қолға алынып жатқан істер туралы әңгімелеп берді.
Бұдан кейін кеңес мүшелері облыстық соттың судьялары, аудандық және оларға теңестірілген соттардың төрағалары мен судьяларының бос тұрған лауазымдарына конкурсқа қатысуға жіберілген үміткерлердің әрбіреуімен жеке әңгімелесіп, сауалдар қойып, соның негізінде ұсыныс сипатындағы қорытынды берді.
«Арқа ажарының» өз ақпараты.
