Жан
Эйфель көрсем,
Әуелеймін әнменен,
Сена бойлап,
Серуендеуді сән көрем,
Бала кезде
Оқығанда таң қалғам,
Француздың
Есіміне Жан деген!
Жанна д’Арк жалын құшып,
Жанғанда,
Жан-Жак Руссо
Жан-жақты сөз жазғанда,
Жан Вальжанның
Жанталасқан тағдыры,
Жаңғырығып,
Ой салған ғой жалғанға!
Виктор Гюго
Жазып кеткен Жан Вальжан,
Бізде де бар
Жан деген сөз, бар Балжан,
Болса керек
Француз бен қазақта
Өмір сүйгіш,
Ғаламдағы ең бай жан!
Адамзаттық комедия –
Ай затты,
Әлем білер
Жазған жайсаң Бальзакты,
Бір романды
Бір-ақ түнде жырлаған,
Білер ме еді
Біздің Иса Байзақты?!
Байзақ болса
Өлең-жырдың Бальзагы,
Бальзак болар
Қара сөздің Байзағы,
Барлығы да
Ұлы өмірдің ағыны
Сана, Сена!
Үйлеспейді қай жағы?!
Сән киініп,
Қазақ атқа мінгенде,
Құмар енді,
Көзге түсіп жүргенге,
Бұл жағынан
Француздар сияқты,
Деген жазу
Маржан болар білгенге!
Топ алдында табиғатын
Атамның,
Тура танып, ойға қалдым,
От алдым,
Жазған орыс,
Оқымысты Потанин,
Досы болған
Ұлы қазақ Шоқанның!
Ғалым адам
Білгендіктен жазады,
Жазғанының
Жанға жағар ғажабы:
Азияның французы
Қазақтар,
Француздар
Европаның қазағы!
9-10.10.2017ж.
Селяви – Солай
Өмірді ешкім,
Айтпайды сірә оңай деп,
Қайда да ылғи
Оңынан келер орай жоқ,
Селяви дейді
Қиналған сәтте француз,
Сабырға келер,
Даланың ұлы солай деп!
Селяви – солай,
Селяви – солай,
Осылай,
Өмірдің жолы
Сан тарау, сынақ, досым-ай,
Француз, қазақ,
Ұйқаса қалған қалайша,
Селяви – солай,
Өмірлік ұғым қосып- ай!
Е, өмір солай,
Дегені қазақ – селяви,
Даланың сөзі
Даналық тұнған, тола күй,
Селяви – солай,
Қонақжай болса бұл қазақ,
Дүние шіркін,
Адамдар үшін қонақ үй!
Керемет Париж,
Көңілде өлең, тола күй,
Эйфельді бойлап,
Тұрғандай билеп қала би,
Сіздермен, достар,
Бір ғана сәтте кездесіп,
Қоштасып жатсақ,
Солай ғой, өмір,
Селяви!
Баянғали Әлімжанов.
8.10.2017ж.
