НҰР-СҰЛТАН. ҚазАқпарат – Қазақстанда «Спутник V» вакцинасы ресми тіркелген жоқ. Бұл туралы ҚР Денсаулық сақтау вице-министрі – Бас мемлекеттік санитар дәрігер Ерлан Қиясов айтты, деп хабарлайды ҚазАқпарат тілшісі.
«Тіркеу құжаттамалары қаралып жатыр. Біз тиісті топтамаларды әзірлеу үстіндеміз. Олар қарастырылуда. Бір рет әкелуге рұқсат беру негізінде 22 мың доза вакцинаның алғашқы топтамасы жеткізілді», – деді Ерлан Қиясов Орталық коммуникациялар қызметіндегі баспасөз мәслихаты барысында БАҚ өкілдерінің сауалына орай. Сонымен қатар ол ресейлік вакцинаның таяу күндері елімізде тіркелетіндігін баса айтты. Ал ҚР Денсаулық сақтау вице-министрі Ажар Ғиният Қазақстан тұрғындарына вакцина салынғанға дейін министрлік Ресейден аталған препаратқа қатысты клиникалық зерттеудің барлық мәліметтерін сұрағанын жеткізді. «Біз бірінші, екінші және үшінші фаза бойынша барлық есепті алдық және дәрілік заттарға сараптама жасау ұлттық орталығында сараптама жүргізілді. Аталған препараттары бір рет әкелуге рұқсат берілді», – деді ол. Айта кетейік, Мемлекет басшысы Қасым-Жомарт Тоқаевтың тапсырмасымен 1 ақпанда Қазақстанда «Спутник V» вакцинасын ерікте негізде егу науқаны басталады.
https://www.inform.kz/kz/kazakstanda-sputnik-v-vakcinasy-resmi-tirkelgen-zhok-erlan-kiyasov_a3748982
