Жуырда «Ақмола облысының өзбек ұлттық-мәдени орталығы» қоғамдық бірлестігінің төрайымы ретінде Қазақстан Республикасы Тәуелсіздігінің 30 жылдығына арналған «Мемлекеттік тіл – барлық қазақстандықтарды топтастырудың маңызды факторы» тақырыбындағы кездесуге қатыстым.
Кездесу барысында онлайн форматында Көкшетау қаласының №5 көпсалалы «Таңдау» гимназиясының ұстаздары мен 9-10 сынып оқушыларымен сұхбаттастық. Мемлекет басшысы Қасым-Жомарт Тоқаевтың Жолдауындағы «Қазақ тілінің мемлекеттік тіл ретіндегі рөлі күшейіп, ұлтаралық қатынас тіліне айналатын кезеңі келді деп есептеймін» деген ойы жайлы өз пікірімді айттым. Жаһандану заманында осы қазақ тілінің болашағын қалай елестететінім жайлы ойыммен бөлістім. Кездесу өте мазмұнды өтті. Оқушылар мен ұстаздар да өз пікірлерін ортаға салып, мемлекеттік тілдің маңыздылығына үлкен көңіл бөлінді.
Қазақ тілі өміршең болсын десек, мемлекеттік тілді үнемі қолданып, оның дамуына қолдау көрсетуіміз қажет. Қазақстанды Отаным деп санайтын әр азамат қазақ тілін үйренгені абзал. Ұлтым өзбек болса да, Қазақстан азаматы екенімді мақтанышпен айтамын. Мемлекеттік тілді еркін меңгергенім еңбек жолымдағы жетістіктерге жетуіме де септігін тигізді деп есептеймін. Тілді қолдану аясын кеңейту жолында еліміздің болашағы жас ұрпақпен кездесіп, насихаттау жұмысын жүргізуде өз үлесімді қосқаныма қуаныштымын.
Тожибуви МЕДЕТОВА,
Ақмола облысының өзбек ұлттық-мәдени орталығының төрайымы.
