Көкшетаудағы «Қоғамдық келісім» мекемесінің ұжымы 14 наурыз – Көрісу мерекесіне орай сахналық қойылым көрсетті.
Көрісуді халқымыз Амал мерекесі деп те атайды. Адамдар бұл күні бұрынғы өкпе-ренішін кешіріп, араздықты ұмытып, бір-біріне амандық-саулық тілейді. Көктемге аман-есен жеттік деп, дастархан жайып, үлкендерге сәлем беріп, құттықтап жатады. Қазақ халқының салт-дәстүрлерінің бірі Амал мерекесінің осындай ерекшелігімен өзге ұлт өкілдерін таныстыру, қазақтың салт-дәстүрін қастерлеуге баулу мақсатында «Қоғамдық келісім» мекемесінің ұжымы қойған қойылымнан мерекенің лебі сезіліп тұрды. Қойылым кезінде көрші-қолаң, құда-жекжат қыстан аман-есен шыққандарына қуанып, мерекеге арнап жайылған ақ дастархан басында бір-біріне жылы лебіздерін арнап, домбырада ән шырқады.Облыстық ардагерлер кеңесінің төрағасы, қоғам қайраткері Ғосман Төлеғұлдың, «Қоғамдық келісім» мекемесінің қызметкері Ажар Құрманқұлованың домбырада асқақтата шырқаған халық әндері көңілдерді көтеріп, жүректерге көктемнің шуағын шашқандай болды. Балалар асық ойнап, әжелер ұршық иіріп, халқымыздың салт-дәстүрін паш етті.
«Қоғамдық келісім» мекемесі басшысының орынбасары Күнім Оразбаеваның айтуынша, аталған мекеме биылғы Наурыз мерекесіне ерекше дайындықпен келіп отыр. Ұжым Ұлыстың ұлы күні қарсаңында барша этномәдени ұйымдармен бірлесіп, ауқымды шаралар өткізуді жоспарлап қойған.
Венера ТАЛҒАТҚЫЗЫ,
«Арқа ажарының» өз тілшісі.
Суреттерді түсірген Берік ЕСКЕНОВ.
