Математика және механикадан Өмірбек Жолдасбеков атындағы зерттеу жобаларының халықаралық байқауында ақмолалық оқушылар жүлдегер атанды.
«Дарын» республикалық ғылыми-практикалық орталығы ағымдағы жылдың 1-3 наурызы аралығында Әл-Фараби атындағы Қазақ ұлттық университетімен бірлесіп, математика және механика бойынша Ө.Жолдасбеков атындағы зерттеу жобаларының ХІ халықаралық байқауын ұйымдастырды. Іс-шара белгілі ғалым Өмірбек Арысланұлы Жолдасбековтың 90 жылдық мерейтойына орай өткізілді.
Еліміздегі эпидемиологиялық жағдайға байланысты байқау онлайн форматында өтіп, оған Франция, Индонезия, Түркия, Тәжікстан, Қырғызстан мемлекеттерінен және Қазақстанның барлық өңірлерінен 200-ден астам бала қатысты. Оқушылар додасының негізгі мақсаты – мектептерде беріліп жатқан математикалық білімді дамытуға барынша ықпал ету, білім алушылардың зерттеу қабілеттері мен инфрақұрылым жүйесін жетілдіру.
Байқауға Ақмола облысынан 8 оқушы қатысып, білгірлер сайысында бақ сынады. Нақты айтқанда, олар өздерінің ғылыми жобаларын математика, қолданбалы математика, экономика, механика секцияларында қорғады.
Халықаралық деңгейдегі байқаудың қорытындысы бойынша Бұланды ауданының Новобратск орта мектебінің 11 сынып оқушысы Иван Бокшан күміс медальмен марапатталды, жоба жетекшісі – Екатерина Саратова. Ал, Бұланды ауданы Макинск қаласы №3 орта мектебінің 10 сынып оқушысы Мария Черненкова, Бурабай ауданы Щучинск қалалық №1 мектеп-гимназиясының 11 сынып оқушысы Риза Нұрпанова, Бурабай ауданы, С.Сейфуллин атындағы орта мектебінің 9 сынып оқушысы Әмір Дәулетов қола медальдарға ие болды.
–Менің ғылыми жобамның тақырыбы «Бурабай курорттық аймағының дамуына шетелдік туристердің келуінің ықпалы». Бұл тақырып қазіргі таңда туризмді дамыту мәселесіне арналып отыр. Бар мүмкіндіктерді пайдалана отырып, орындап жасап шыққан жобам байқау қорытындысында ерекше атап өтіліп, жүлделі орынға ие болғаным ерекше қуанышқа бөледі. Мұндай байқаулар бізді шығармашылық жағынан шыңдап, жаңа мүмкіндіктерге қол жеткізуімізге жетелейді, білім мен ғылымға деген қабілеттеріміздің ұштала түсуіне ықпал етеді. Сондықтан, мен өзімнің жоба жетекшім Әлия Мусаипова мен қолдаушыларыма зор алғысымды білдіремін, – дейді Риза Нұрпанова.
Оқушыларды халықаралық деңгейдегі байқауға дайындағаны үшін облыстық білім басқармасы тарапынан пән мұғалімдеріне алғыс айтылды. Үміт артып отырған жас математиктеріміз болашақта үлкен жетістіктерге жетеді деген ойдамыз.
Ырысалды ТӨЛЕГЕНҚЫЗЫ.
