Көкшетауда Мәдениет және өнер саласы ұйымдары мен қызметкерлерінің «Рухани қазына – 2021» фестивалінің салтанатты ашылуы болып өтті.
Шараға Қазақстан Республикасының Мәдениет және спорт министрі Ақтоты Райымқұлова, Ақмола облысы әкімінің орынбасарлары Мәлгәждар Тәткеев пен Айна Мысырәлімова, отандық және халықаралық сарапшылар, мәдениет саласының және театр қайраткерлері қатысты.
Осы ретте, Мәдениет және спорт министрі Ақтоты Райымқұлова фестивальдің ұйымдастыру комитетінің шешімімен Көкшетау тұңғыш рет «Қазақстанның 2021 жылғы мәдени астанасы» деп жарияланған атап өтті. Бұл өз кезегінде мәдени астана мәртебесі берілген өңірдің мәдениет және өнер саласындағы қол жеткізген жетістіктері мен озық тәжірибесін іс жүзінде өзге өңірлермен бөлісуге мүмкіндік береді.
«Рухани қазына» фестивалі, бұл – өнер мен мәдениет мерекесі. Сіз бен бізге ортақ қуаныш. Осыған дейін әр өңірде басталған байқау бірнеше кезеңнен өтіп, қорытынды межеге жақындады. Ең басты мақсат – үздік қызметкерлер мен ұйымдарды анықтап қою ғана емес, олардың өзара тәжірибе алмасып, жаңа сапаға көтерілу үшін бірлесе қызмет етуіне мүмкіндік сыйлау. Олай болса, Фестиваль өз мақсатын орындап, бәріміз үшін нәтижелі болады деген сенім білдіремін!», – деді Ақтоты Райымқұлова.
Шара барысында Ақмола облысының 10 мәдениет қызметкеріне Мәдениет және өнер саласы қызметкерлері күніне орай «Мәдениет саласының үздігі», «Құрмет грамотасы», «Алғыс хат» тапсырылды.
Айталық, Мәдениет және спорт министрлігі мен Ақмола облысы әкімдігі арасында аталмыш жылды іске асыру жөніндегі іс-шаралардың жол картасы әзірленіп, бекітілді. Осы жоспарға сәйкес, мәдени, концерттік, музей және кітапхана салаларында бірқатар мәдени шаралар өткізілуде.
«Рухани қазына – 2021» фестивалі Ақмола облысында үш күнге дейін жалғасатын болады.
