Өңірлік коммуникациялар қызметінде Ақмола облыстық ауыл шаруашылығы басқармасы басшысының орынбасары Мұрат Іргебаев пен облыстық ветеринария басқармасының басшысы Талғат Жүнісов «Ет өндірісін кеңейту мәселелері» бойынша баспасөз мәслихатын өткізді.
Бұған дейінде Ақмола облысында этиологиясы анықталмаған ауруды анықтау фактілері республикалық телеарналар мен әлеуметтік желілерде (Instagram, Facebook) көрсетілгені белгілі. Жалпы, облысымыздың алты өңірінде, яғни, Ақкөл, Аршалы, Ерейментау, Целиноград, Біржан сал аудандары мен Стеногорск қаласында ауыл шаруашылығы жануарларының этиологиясы белгісіз аурулары анықталды. Бүгінгі күнге облыс бойынша 2453 бас ірі қара, 520 ұсақ мал басы, төрт бас шошқа осындай аурумен ауырған. Үй иелерінің айтуынша, жануарлар осы жылдың маусым айының соңынан бастап ауыра бастаған. Жалпы симптомдарына келсек, тамақтанудан бас тарту, су да ішпей, температурасы 40°C дейін жоғарылаған, ауыз қуысында қабыну, шырышты қабықтың қызаруы, тілдің шырышты қабығынан бас тарту, сілекей, хромат, емшекте жаралар мен іріңдер пайда болған.
Брифинг барасында хабарламашылар, ветеринарлық қызмет мамандары ауылдардағы ауру малдарды күнделікті тексеріп, тиісті симптоматикалық ем жүргізетінін және қазіргі уақытта аудандардағы ауру малдың 90 пайызы сауығып кеткенін жеткізді. Мұндай ауру белгілерінің пайда болуына бірден-бір себеп, биылғы жылы облыс аудандарында жауын-шашынның нормадан төмен болуы, соның нәтижесінде құрғақ ауа райынан шөптің болмауы, болған күнде де сирек әрі қаттылығымен малдың ауыз қуысы мен шырышты қабығын зақымдағаны өкінішті-ақ. Оның үстіне Заңнамаға сәйкес, емдеу шараларын жүргізуге бюджеттен қаражат қарастырылмаған, емдеу тек қана мал иелерінің есебінен жүргізіледі екен. Ерекше қауіпті аурулардың диагнозын қою үшін патологиялық материалдар ветеринарлық зертханаға жеті рет жіберілген. Сонымен қатар, зертханаға жіберу үшін жаңадан диагноз қойылған ауру жануарлардан зерттеу үшін қайтадан биологиялық материалдар алынған. Бүгінде жалпы, жағдай облыстық ветеринарлық қызметтің күнделікті бақылауында тұр.
Брифингте хабарлама жасаған облыстық ауыл шаруашылығы басқармасы басшысының орынбасары М.Іргебаевтың мәлімдеуінше, ағымдағы жылдың жеті айының қорытындысы бойынша ауыл шаруашылығының жалпы өнімінің көлемі 118 пайызға өсуімен 155,4 миллиард теңгені құраған, бұл республикадағы ең жақсы көрсеткіш, екенін де атап көрсетті. Мәселен, ең жоғары өсу қарқыны Бұланды ауданында 1,9 есеге жетсе, Көкшетауда 1,4 есеге өсуі ауыл шаруашылығындағы ет өндірісінің ұлғаюы есебінен байқалып отыр. Әрине, статистикалық мәліметтерге сүйенсек, облыста ауыл шаруашылығы жануарларының санының біртіндеп өсуі байқалады. Сонымен, осы жылдың 7 айының қорытындысы бойынша, шаруа қожалықтарының барлық санаттарындағы ірі қара малдың жалпы саны 493,7 мың бас, оның ішінде 236,2 мың бас сиыр, 626,4 мың басы қой мен ешкі, 230,7 мың бас жылқы, 101,1 мың бас шошқа. Ал, құс еті 9,9 миллион бас немесе 130,0 пайыз. Сондай-ақ, сүт өндіру саласы 244,2 мың тонна болса, жұмыртқа 462,6 миллион дана, яғни, 92,5 пайызды құраған.
Облыстағы шаруашылықтардың құрылуына тоқталсақ, етті мал шаруашылығын одан әрі дамыту аясында 2021 жылы 5,9 мың бас етті ірі қара малын сатып ала отырып, өңірімізде 112 шаруа қожалықтарын құрудың жол картасы әзірленген. Бүгінгі таңда 2170 басқа 35 шаруа қожалығы құрылса, дәл қазіргі кезеңде 1792 басқа арналған 29 шаруа қожалығы жұмыс істеп тұр.
Хабарламашының айтуынша, алдағы қыста шаруашылықтардың барлық санаттарын жеммен қамтамасыз ету аясында Ақмола облысының әкімі жемшөппен толық қамтамасыз ету бойынша ұйымдастыру мәселелерінің кешенін шешуге бағытталған Іс-шаралар жоспарын бекіткен. Облыста, әр ауданда, аудан, қала әкімдерінің, олардың ауыл шаруашылығын дамытуға жауапты орынбасарларының, жауапты қызметтер мен агроқұрылымдардың басшыларының басшылығымен мал азығын сатып алу бойынша жедел штабтар құрылған. Апта сайын шөп дайындау бойынша жедел штабтың отырыстары республикалық және облыстық деңгейде де өткізіліп тұрады.
Асылай ҚАДЫРҚЫЗЫ,
«Арқа ажарының» өз тілшісі.
