«Бір ел – бір кітап» акциясы аясында биылғы жылы ел тәуелсіздігінің 30 жылдығына орай, жалпыхалықтық оқуға тағы да бір топ таңдаулы кітаптар іріктеліп алынды.
Атап айтқанда, «Тәуелсіздігіміздің 30 жылдығына – 30 кітап» ұранымен танымал қазақстандық авторлардың поэзия, проза, драматургия, балалар әдебиеті және аударма саласындағы 30 үздік туындысы ұсынылды. Оның ішінде балалар әдебиетінен 6 жазушының кітабы жыл кітабына енді. Соның бірі Толымбек Әбдірайымның «Алабұға аулаған күн» атты шығармасы.
Орталық қалалық балалар және жасөспірімдер үлгілі кітапханасы осы акция аясында балалар жазушысы, Қазақстан Республикасының мәдениет қайраткері Толымбек Әбдірайыммен «Балалар әдебиеті – ұлт болашағы» атты онлайн кездесуін өткізді. Әр сөзінде ғибрат пен тәлім, шындық пен жүрек сыры бар балалар жазушысы жас оқырмандарға «Алабұға аулаған күн» кітабының жарыққа шығу тарихы, өзінің балалық шағы, кітап оқуға неше жасынан құмар болғаны, әдебиеттегі жазушылық қадамы, жазған туындылары жайлы әңгімелеп берді.
Жас оқырмандар сүйікті жазушыларымен оқыған әңгімелері туралы пікірлерімен бөлісті. Балалар тақырыбына өнімді жазып жүрген белгілі қаламгермен кездесуден кітапхананың жас оқырмандары – Көкшетау қаласының №6 мектеп-лицейінің 4 сынып оқушылары үйлеріне үлкен әсер алып тарады.
Бақытжан АЙДОСОВА,
Көкшетау орталық қалалық
балалар және жасөспірімдер үлгілі кітапханасының меңгерушісі.
