Тәуелсіздіктің 30 жылы ішінде Ақмола облысының индустриялық секторы орасан зор серпіліс жасады, 35 ірі және орта өнеркәсіптік кәсіпорын құрылды, олардың арасында халықаралық стандарттарға сәйкес келетін жаңа заманауи жоғары технологиялық зауыттар мен фабрикалар бар. Кейбір іске қосылған өндіріс қуаттарының өнімділігі сол өнім түрі бойынша еліміздің едәуір қажетін өтейді.
1991 жылдан бастап тауарлық өнім өндірісі 100 еседен астам өсті, 30 жыл бұрын өңдеу саласының үлесі 60 пайызды құрады, ал бүгінгі күні 80 пайыздан асады.
Жыл сайын мемлекеттік бағдарламаның арқасында инвестиция көлемі артып, жаңа жұмыс орындары ашылуда, деп хабарлайды ішкі саясат басқармасы.
Кәсіпкерлік және өнеркәсіп басқармасының басшысы Ербол Оспановтың айтуынша, индустриялық сектор өңір экономикасын дамытудың басым бағыттарының бірі болып табылады.
–Инвестициялар көлемінің өсуіне негізінен инвестициялық жобаларды іске асыру ықпал етеді. Тәуелсіздік жылдары өнеркәсіпте 530,3 миллиард теңгеге 239 жоба іске асырылды, 13,3 мың жаңа жұмыс орны құрылды, оның ішінде 103 жоба индустриялық-инновациялық дамудың мемлекеттік бағдарламасы аясында, – деп өз ойымен бөлісті ведомство басшысы.
Өңірдегі маңызды жобалардың бірі – Степногорск қаласында қуаттылығы жылына 180 мың тоннаға дейінгі күкірт қышқылы зауытын реконструкциялау, Целиноград ауданында өндіру қуаты жылына 20 мың тоннаға дейінгі бройлер құс фабрикасы, қуаты 4,1 тоннаға дейін баратын Ақсу, Бестөбе және Жолымбет кеніштеріндегі алтын өндіру фабрикалары.
Бүгінде мемлекеттік бағдарламалар аясында тиісті жобаларды іске асырудың арқасында облыста полипропиленнен жасалған қаптама ыдыс, соя майы, тау-кен өндіру, қорғаныс және авиация өнеркәсібіне, теміржол көлігіне, мұнай-газ кешеніне арналған құйма бұйымдар, халық тұтынатын тауарлар, ауыл шаруашылығы техникасы және тағы басқа осы сияқты тауарлардың өндірісі игерілді. Ағымдағы жылы жалпы инвестициялық сомасы 22 миллиард теңгенің 22 индустриялық жобасын іске қосу жоспарланған, бұл 400 мыңнан астам жаңа жұмыс орындарын құруға мүмкіндік береді.
Қазірдің өзінде 12 жоба пайдалануға беріліп, 968 жаңа жұмыс орны ашылды. Олардың ішінде ең ірілері Степногорск қаласында өнімділігі жылына 5 миллион тонна алтын өндіру фабрикаларының құрылысы, Көкшетау қаласында ауыл шаруашылығы техникасының өндірісін кеңейту жобасы.
«Арқа ажарының» өз ақпараты.
