Биылғы жаңа оқу жылында Ақмола облыс бойынша 15 мыңнан астам бүлдіршін мектеп табалдырығын аттап, алғашқы қоңырау соғылды. Облыс орталығындағы №1 мектеп-гимназиясында өткен салтанатты шараға облыс әкімінің орынбасары Елдос Рамазанов қатысып, алғаш мектеп табалдырығын аттаған жас өрендерге сәт сапар тіледі.
Көкшетау қалалық №1 мектеп-гимназиясында 2 мыңнан астам оқушы білім алады. Енді олардың қатары тағы 384 оқушымен толықты. Салтанатты шара барысында мектеп табалдырығын енді аттаған бүлдіршіндерге әліппе табыс етілді.
– Жаңа оқу жылына 100 пайыз дайындықпен келдік. Оқушыларға жаңа оқу корпусы пайдалануға берілді. Қазіргі таңда оқушылар толық оқулықпен қамтамасыз етілді. Техникалық база жақсартылды, – дейді Көкшетау қалалық №1 мектеп-гимназиясының директоры Сандуғаш Нұрқанова.
Жыл санап өңіріміздегі білім ошақтарының саны артып келеді. Осы оқу жылының өзінде облыс бойынша 6 мектеп пайдалануға беріліп отыр. Ал, құрылысы басталған 9 мектеп келесі оқу жылында тапсырылады деп көзделген.
– Ақмола облысында 560-қа жуық білім ұйымы бар. 140 мыңға жуық оқушы жаңа оқу жылын бастады. Соның 15 мыңнан астамы бірінші сыныпқа қабылданды. Оларға сәттілік тілейміз. Жаңа оқу жылынан жаңа жетістіктер мен табыстар күтеміз, – дейді өз сөзінде облыстық білім басқармасы басшысының орынбасары Ботагөз Дүйсенова.
Салтанатты шара барысында бүлдіршіндер өз өлеңдерін оқып, соңы көңілді әнге ұласты.
Асылай ҚАДЫРҚЫЗЫ.
