Ақмола облыстық Полиция департаменті баспасөз қызметінің мәліметінше, 42 жастағы мас жүргізушіні «Әскер 2» патрульдік экипажының қызметкерлері қыркүйектің 23-де түнгі сағат 03:20 шамасында Көкшетау қаласында Әуезов және Назарбаев көшелерінің қиылысында ұстаған.
«Абай және Ғабдуллин көшелерінің қиылысында бағдаршамның жасыл түсі жанған кезде «Toyota Ipsum» көлігі орнынан қозғалмай тұрған. Тек полицейлердің сол жаққа бұрылғанын көрген жүргізуші жүре бастады. Бұл бірден тәртіп сақшыларының назарын аударды. Полиция қызметкерлері көліктің соңына түсіп, Әуезов көшесі мен Назарбаев даңғылының қиылысында тоқтатты. Сыртқы белгілері бойынша жүргізуші масаң күйде болған», – деді ведомстводан.
Кейін деректер базасы бойынша тексеру кезінде аталған азаматтың 2020 жылғы қаңтарда 7 жыл мерзімге көлік басқару құқығынан айырылғаны анықталды. ҚР ҚК-нің 346-бабының 1-бөлігі «көлік құралдарын жүргізу құқығынан айырылған және алкогольдік, есірткілік және (немесе) уытқұмарлық масаң күйдегі адамның көлік құралын басқаруы» бойынша сотқа дейінгі тергеу жүргізілуде. Сараптама тағайындалды.
