Қосшы қаласының прокуратурасы полиция қызметкері тарапынан әкімшілік хаттамаларды бұрмалау фактілерін анықтады.
Мәселен, учаскелік полиция инспекторы 2021 жылдың мамыр және тамыз айларында полицияда профилактикалық есепте тұрған Қосшы тұрғынына қатысты тыныштықты бұзғаны үшін ӘҚБтК 437-бабы және иттер мен мысықтарды ұстау ережелерін бұзғаны үшін ӘҚБтК 408-бабы бойынша екі хаттама жасады. Бұл ретте ол құқық бұзушының қолы мен түсіндірмесін бұрмалаған.
Осылайша учаскелік инспектор өзінің ведомстволық көрсеткіштерін жасанды түрде арттырды.
Қала прокурорының наразылығы бойынша сот әкімшілік жауапкершілікке тарту туралы заңсыз қаулылардың күшін жойды. Ал6 полицейге қатысты әкімшілік құқық бұзушылық туралы істерге қатысты дәлелдемелерді бұрмалағаны үшін Қылмыстық кодекстің 416-бабының 2-бөлігі бойынша қылмыстық іс қозғалды.
Сотқа дейінгі тергеуді Ақмола облысы прокуратурасының арнайы прокурорлары жүзеге асырды. Сөйтіп, Қосшы қалалық сотының 2023 жылғы 7 ақпандағы үкімімен полиция қызметкері бір жылға бас бостандығынан айырылды. Бұған қоса, рақымшылық актісі бойынша негізгі жазадан босатылып, бес жылға мемлекеттік қызмет атқару құқығынан айыру түріндегі қосымша жаза қолданылды. Үкім заңды күшіне енді.
Азаматтардың конституциялық құқықтарын қорғау жөніндегі жұмыс әрқашан қала прокуратурасының ерекше бақылауында болады.
Ақмола облысы прокуратурасының баспасөз орталығы.
