Тәуелсіз мемлекетіміздің қол жеткізген маңызды жетістіктерінің бірі – қазіргі заманғы қазақстандық қоғамда ұлтаралық және дінаралық келісімге негізделген әлеуметтік тұрақтылық болып табылады. Елімізде өмір сүретін этностардың ауызбірлігі мен төзімділігі қазақстандықтар үшін егеменді ел болу жолындағы күрделі кезеңдерден өтіп, бүгінге дейін ел дамуына үлкен үлес қосып келеді.
Өткен уақыт ішінде тәуелсіздік мұраттары мен әлемдік демократиялық құндылықтар негізінде жалпыұлттық консенсусты нығайту бойынша орасан зор жұмыс жүргізілді. Бұл Қазақстан мемлекетінің беделін арттыруға ықпал етті және бізге маңызды халықаралық бастамалармен сөз сөйлеуге мүмкіндік берді. Конфессияаралық келісім мен толеранттылықтың бастауы біздің ежелгі тарихымыздан шыққанын атап өткім келеді. Ғасырлар бойы қазіргі Қазақстан аумағында әртүрлі діндерді ұстанатын көптеген халықтар бейбіт қатар өмір сүрді. Сонымен қатар, толеранттылық – байырғы қазақ халқының мінезіндегі айрықша психологиялық ерекшелігі болып табылады.
Конфессияаралық өзара түсіністікті одан әрі нығайту үшін оларды үнемі қолдап отыру қажет. Елімізде ой, ар-ождан, дін және сенім бостандығы үшін барлық жағдайлар қарастырылған. Мысалы, мемлекетімізде өзара қарым-қатынасты реттеу үшін заңнамалық актілер жасалған. Оған дәлел ретінде Қазақстан халқы Ассамблеясы құрылып, келісім туралы көптеген халықаралық фактілерге қол қойылғандығын айтуға болады. Сонымен бірге, әртүрлі тілдерде газеттер шығарылып, ұлтаралық және конфессияаралық ынтымақтастық дамуда. Бірақ, ең бастысы, бұл адами фактор. Оңшыл мемлекеттің азаматтары адамдардың бір-бірінен өзгеше болуы, өз мәдениетін, тілін, құқығын білуі керек екендігін есінде сақтауы қажет.
Бүгінде Ақмола облысында 12 діни конфессия тіркелген және 191 діни бірлестік әрекет етеді. Дін тұту бойынша 90 ислам, 47 православ, 41 протестанттық, 11 католик, Бахаи діні және Ақмола облысының Кришна Санасы Қоғамы, ал, діни нысандар бойынша 89 мешіт, 29 православие шіркеулері, 12 католиктік шіркеулер мен 22 протестанттық үй қызмет атқарады. Облыс аумағында уағыздау қызметін 32 миссионерлер қамтамасыз етеді.
Дін істері басқармасы жанындағы «Ынтымақ» діни бірлестіктер басшыларының жиналысы басқарманың облыстың діни бірлестіктерін біріктіруінің маңызды диалог алаңы ретінде ерекше орын алады. 2023 жылдың басынан бері жиналыстың 3 іс-шарасы өткізілген. Мәселен, ағымдағы жылдың 28 тамызында «Ынтымақ» діни бірлестіктер басшыларының және мүшелерінің қатысуымен дөңгелек үстел өткізілді. Жиында Қазақстан Республикасының Конституция күні, сондай-ақ, 2022-2026 жылдарға арналған сыбайлас жемқорлыққа қарсы саясат тұжырымдамасы, сыбайлас жемқорлыққа қарсы іс-қимыл саласындағы соңғы заңнамалық түзетулер және «Сыбайлас жемқорлыққа қарсы еріктілер» жобасы жөніндегі мәселелер талқыланып, қатысушылар өз пікірлерімен алмасты.
Сонымен бірге, облыстың дін мәселелері бойынша ақпараттық-түсіндіру топтарының жұмысы жалғасуда. Қазіргі уақытта облыста 217 адамнан тұратын 24 ақпараттық түсіндіру топтары жұмыс істейді. Жыл басынан бері олар 3546 түрлі форматтағы іс-шаралар өткізілді, оған 63277 адам қатысты. Оның ішінде тікелей облыс жастарымен 10488 адамның қатысуымен 389 іс-шара жүзеге асырылды. Ақмола облысының БАҚ-тарында діни қатынастар саласындағы тақырыптарды көрсететің 5131 материал жарық көрді.
Жалпы, Ақмола облысындағы діни жағдайды талдау аймақта тұрақтылықтың, толеранттылықтың және басқарылу жағдайының бар екендігін көрсетеді. Осы уақыт аралығында діни негізде шиеленістер тіркелген жоқ. Өңірде жүргізілетін діни қатынастар саласында мемлекеттік саясат рухани-адамгершілік жағдайды тұрақтандыруға, толерантты сана қалыптастыруға, сенім төзімділігі негіздерін нығайтуға, әр түрлі ұлт өкілдерінің өзара түсіністігіне ықпал етеді. Тұрақтылық атмосферасын сақтауға дін саласында мемлекеттік органдардың біріктіруші рөлі, дін саласындағы мемлекеттік саясатқа діни бірлестіктер жетекшілерінің конструктивті ұстанымы, сонымен қатар, облыстағы 12 конфессия діншілдері арасындағы ертеректегі дәстүрлі сенім шыдамдылығы және өзара сыйластық әсер етті деп айтуға болады.
Алмаз МҰҚАЖАНОВ,
Ақмола облыстық дін істері басқармасының басшысы.
