Мемлекет басшысының Алматы өңірінде және Щучье-Бурабай курорттық аймағында туристік нысандарды дамыту туралы тапсырмасын іске асыру үшін Алматыда туризм саласындағы өңіраралық ынтымақтастық мәселесі бойынша кеңес өтті. Іс-шараға Ақмола облысының әкімі Марат Ахметжанов, Алматы қаласының әкімі Ерболат Досаев, Алматы облысы әкімінің орынбасары Рустам Исатаев, сондай-ақ, туризм басқармаларының басшылары қатысты.
Алматы әкімі Ерболат Досаев атап өткеніндей, шаһардың экономикалық дамуы оның туристік тартымдылығының өсуімен тығыз байланысты. 2023 жылы Алматы ШЫҰ-ның мәдени және туристік астанасы болып танылды, бұл туристер санының 2022 жылмен салыстырғанда 12,6 пайызға көбеюіне әсер етті.
Өткен жылдың қорытындысы бойынша Алматыға 2 миллионнан астам адам келді, шетелдік туристер саны 29,5 пайызға өсті, бұл қаланың туристік бағыт ретіндегі жаһандық тартымдылығын растайды. Туризмді дамыту инфрақұрылымға салынған инвестиция арқылы жүзеге асады, биылғы 7 айда 54,6 миллиард теңге инвестици салынды. Туризм саласынан түсетін салық түсімдері 32,4 пайызға өсіп, жарты жылда 40,6 миллиард теңгеге жетті.
Щучье-Бурабай курорттық аймағы, Зеренді курорттық аймағы, «Бурабай», «Көкшетау», «Бұйратау» мемлекеттік ұлттық саябақтары және Қорғалжын қорығы сияқты бірегей табиғи нысандар орналасқан Ақмола облысы да туризмді дамытуға кіріскен.
Ақмола облысының әкімі Марат Ахметжановтың айтуынша, өңірде емдеу-сауықтыру, рекреациялық, экологиялық және аграрлық туризм орталықтары белсенді дамып келеді. 2023 жылдың және осы жылдың бірінші жартыжылдығының нәтижесі оң сипатқа ие. Өңірге жалпы туристік ағын 6 пайызға өсіп, 1,3 миллион келушіге, оның ішінде 18,2 мың шетелдік туристке жетті. Бұл өткен жылмен салыстырғанда 114 пайызға көп. Көрсетілген туристік қызмет көлемі 23 пайызға өсті, ал, соңғы үш жылда туризм саласына салынған инвестиция екі есеге артып, 2023 жылы 27,8 миллиард теңгеге жетті. Өңірде инвестиция тарту және қолайлы инвестициялық ахуал жасау бойынша белсенді жұмыс жүргізіліп келеді. Бұл Ақмола облысының туристік әлеуетінің тұрақты өсуі мен дамуын қамтамасыз етеді.
Алматы облысы әкімінің орынбасары Рустам Исатаев өңірде Қазақстанның туристік картасына енгізілген 33 аумақтың 9-ы шоғырланғанын атап өтті.
–Бізде «Көлсай көлдері», «Шарын» және «Іле-Алатау» мемлекеттік ұлттық табиғи саябақтары сияқты бірегей табиғи нысандар бар. Туристер үшін инфрақұрылымды дамыту бойынша белсенді жұмыс істеп жатырмыз. Жаңа орналастыру нысандарын құрып жатырмыз. Биыл алғашқы 6 айда Алматы облысында шетелдік қонақтар саны 73 мыңнан асты, бұл өткен жылмен салыстырғанда екі есеге көп, – деді Рустам Исатаев.
Өткізілген маркетингтік зерттеулерді ескере отырып, Алматы әкімі Ерболат Досаев кеңеске қатысушыларға шетелдердің тәжірибесін пайдалана отырып, отбасылық және балалар пакеті бар бірегей туристік өнімдерді дамытуды ұсынды. Әуе компанияларымен, қонақ үй желісімен және жеңілдетілген қаржыландырумен бірлескен жобалар бойынша бастамалар да қолдау тапты.
Кеңес қорытындысы бойынша тараптар бірыңғай туристік өнімдер құруды, халықаралық нарықтағы орнын нығайтуды, семинар өткізуді және өңірлерді дамыту үшін халықаралық көрмелерге қатысуды көздейтін серіктестік туралы меморандумға қол қойды.
