Байқау
«Достар» мәдениет сарайында 8 наурыз мерекесі қарсаңында қазақ халқының мәдениеті мен салт-дәстүрлері туралы өз білімдерін, сондай-ақ, шығармашылық және зияткерлік қабілеттерін ортаға салған қыздарымыздың «Қазақ аруы — 2025» дәстүрлі байқауы өтті.
Байқау қатысушылардан ерекше дайындықты талап еткен үш кезеңнен тұрды. Бірінші кезеңде қатысушы қыздар өздерін таныстырып, өмірлік құштарлықтарымен және құндылықтарымен бөлісті. Екінші кезеңде зияткерлік викторинаны шешіп, қазақ халқының тарихы мен дәстүрлеріне қатысты сұрақтарға жауап берді. Үшінші кезеңде ән айтып, би билеп, қазақ мәдениеті мен өнеріне қатысты шеберліктерін ортаға салды.
Журналист-ақын Серік Жетпісқалиев бастаған қазылар алқасы қыздардың өнерін, олардың сахналық бейнесін, ұлттық болмысы, салт-дәстүрге икемін ескере отырып, бағалады. Қазылар алқасының мүшелері барлық қатысушылардың дайындығы мен шығармашылық ізденістеріне көңілдері толып, әрқайсысы өз даралығымен және талантымен көрермендерді таң қалдыра алғанын атап өтті.
Барлық қатысушылар қалалық мәдениет, тілдерді дамыту, дене шынықтыру және спорт бөлімі ұйымдастырушысының дипломдарымен және естелік сыйлықтарымен марапатталды.
Соған қарамастан, бұл «Қазақ аруы-2025» байқауында Ақтоты Абдрахман топ жарып, жүлделі бірінші орынға ие болды. Оның тамаша өнер көрсеткені, қазақ халқының мәдениеті мен дәстүрлерін терең білгені, сондай-ақ, байқаудың әрбір кезеңіне жоғары деңгейдегі шығармашылықпен келгені жеңімпазға лайықты жеңіс әкелді. Байқаудың екінші және үшінші орындарын көпшілік көңілінен шыққан Диляра Әбілжанова мен Лаура Аманжол өзара бөлісті.
«Арқа ажарының» өз ақпараты.
