ТАБИҒАТ ҚОРҒАУ
Соңғы жылдары табиғатта жабайы фауна, түлкі, қарсақ, ақкіс, күзен, қарақұйрық және тағы басқаларының аймақтың елді мекендеріне кіру фактілері жиі байқалады.
Қоғамдық жұртшылық өкілдері осы фактілер бойынша бірнеше рет жергілікті атқарушы органдарға жүгініп, әлеуметтік желілерде фотосуреттер мен бейнематериалдар жариялады.
Жаңалықтар порталдарынан біз 2025 жылдың қараша айында Қостанай облысында түлкі адамға шабуыл жасағанын білеміз. Қостанай облысының санитарлық-эпидемиологиялық бақылау департаментінің аса қауіпті инфекцияларды бақылау бөлімінің басшысы Әсел Баймұхаметова 2025 жылы ғана өңір аумағында түлкілер мен қарсақтардың адамдарға шабуыл жасауының 17 фактісі тіркелгенін хабарлады.
Бұл қауіпті дабыл! Жасыратыны жоқ, жабайы жануарлар жұқпалы аурулардың, соның ішінде құтырудың да тасымалдаушысы болып табылады.
Құтыру – бұл мінез-құлықтың өзгеруімен ерекшеленетін, өлімге әкелетін вирустық ауру. Вирустың таралуы тістеу немесе сілекей арқылы жүреді және адамдардың вакцинация үшін дереу ауруханаға баруын қажет етеді. Түлкілер, қарсақтар, тиіндер жабайы табиғат өкілдері арасында құтырудың негізгі резервуары. Осыған байланысты мұндай жұқпалы аурулардың алдын алу мақсатында жергілікті атқарушы органдар бейінді мемлекеттік ұйымдармен бірлесіп, жергілікті жерлерде түсіндіру жұмыстарын жүргізуі қажет.
Ақмола облыстық ветеринария басқармасы, ҚР АШМ ветеринариялық бақылау және қадағалау комитетінің Ақмола аумақтық инспекциясы мұндай жұқпалы аурулардың таралуына жол бермеу үшін қажетті алдын алу шараларын қабылдаулары тиіс. Атап айтқанда, жыртқыштарды тартатын тірі вакцина салынған капсулалары бар арнайы жем-брикеттерді сатып алу және таратулары қажет. Жемді көктемде және күзде орман алаңқайларына салып, жануарлар олармен қоректенеді. Бұл бір жылға иммунитет қалыптастырып, адамдар мен үй жануарларының жұқтыру қаупін азайтады. Бұл шаралар ҚР Премьер-Министрінің орынбасары, ҚР Ауыл шаруашылығы министрінің 2017 жылғы 5 желтоқсандағы №480 бұйрығымен бекітілген.
Осыған орай, жуырда Ақмола облыстық орман шаруашылығы және жануарлар дүниесі аумақтық инспекциясы облыс әкімдігіне, қалалар мен аудандардың әкімдеріне және осыған мүдделі болуға тиіс бейімді басқармалардың басшыларына алаңдаушылық білдіріп, хат жолдады. Инспекция басшысы Лашынтай Дүйсеновтың айтуынша, жабайы жануарлардың елді мекендерге кіруі соңынан осындай қауіпті де тудырады. Сондықтан, алдын алу – міндет. Тиісті орындарға құлаққағыс та сол себепті жасалып отыр.
«Арқа ажарының» өз ақпараты.
