Қазақстан Республикасының Конституциясы – еліміздің басты заңы. Ол мемлекеттің даму бағыттарын, азаматтардың құқықтары мен бостандықтарын, сондай-ақ әрбір адамның қоғам алдындағы жауапкершілігін айқындайды. Конституцияның негізгі қағидалары заңдылықты, әділдікті, қоғамдық келісім мен тұрақтылықты нығайтуға, халықтың өмір сүруіне қолайлы жағдай жасауға бағытталған.
Есіл ауданының тұрғындары үшін туған өлкенің дамуы ерекше маңызға ие. Өйткені Конституцияда белгіленген негізгі қағидаттар мемлекеттік шешімдерден ғана емес, әрбір елді мекеннің күнделікті тыныс-тіршілігінен де көрініс табады.
Бүгінде Есіл ауданында абаттандыру және халықтың өмір сүру сапасын жақсарту бағытында жүйелі жұмыстар жүргізілуде. Республикалық «Таза Қазақстан» экологиялық акциясы тұрақты түрде жүзеге асырылып келеді. Тұрғындар, мекеме өкілдері, еңбек ұжымдары мен жастар аумақтарды тазалау, көшелер мен қоғамдық орындардың тазалығын сақтау жұмыстарына белсенді қатысуда. Мұндай шаралар қоршаған ортаға деген жауапкершілікті арттырып, өскелең ұрпақтың туған жерге деген құрметін қалыптастырады.
Сонымен қатар жол инфрақұрылымының жағдайы да маңызды мәселелердің бірі болып қала береді. Ауданда жолдарды кезең-кезеңімен жөндеу жұмыстары жүргізілуде. Жекелеген учаскелерде ағымдағы және ішінара жөндеу жұмыстары атқарылып, көшелер мен жолдардың жағдайын жақсарту бойынша тиісті шаралар қабылдануда. Әрине, алда әлі де атқарылатын жұмыстар аз емес. Дегенмен осындай жүйелі қадамдардың өзі тұрғындардың қолайлылығы мен қауіпсіздігін қамтамасыз етуде үлкен маңызға ие.
Есіл аудандық Аналар кеңесінің мүшесі ретінде қоғамның дамуы адамға, оның отбасына және қоршаған ортасына деген қамқорлықтан басталады деп есептеймін. Әрбір тұрғын ауданның қоғамдық өміріне өзінің қатысы бар екенін сезініп, ортақ мүлікке ұқыптылықпен қарап, заң талаптарын сақтап, ел игілігі үшін өз үлесін қосуы маңызды.
Конституция – мемлекеттің құқықтық негізі ғана емес, сонымен қатар әділетті, жауапты әрі әл-ауқаты жоғары қоғам құрудың басты бағдары. Оның құндылықтары әрқайсымыздың іс-әрекетімізден, бір-бірімізге деген қарым-қатынасымыздан және туған өлкеміздің болашағы үшін атқаратын ортақ жұмысымыздан көрініс табуы тиіс.
Бірлік, өзара жауапкершілік және белсенді азаматтық ұстаным арқылы Есіл ауданын одан әрі көркейтіп, өмір сүруге қолайлы әрі тартымды мекенге айналдыра алатынымызға сенімдімін.
Гүлназ Байдильдина,
Есіл аудандық Аналар кеңесінің мүшесі.
