Жаз басталысымен жүздеген дем алушылар табиғатқа шығады. Алайда, адамдардың абайсыздығы мен салғырттығы кейде қайғылы өртке әкеп соғады.
Өрт қауіпсіздігі ережелеріне сәйкес өрттердің алдын алу үшін:
– елді мекендердің аумақтары мен ұйымдар шегінде ғимараттардың, құрылыстар мен ашық қоймалардың, сондай-ақ, учаскелерге іргелес орналасқан тұрғын үйлер, саяжайлар мен басқа да құрылыстардың маңайы жанғыш қалдықтардан, қоқыстан, ыдыстан, ағаш жапырақтарынан, құрғақ шөптен уақтылы тазартылуы;
– қызметі дала, орман және тоғайлы алқаптарда жүзеге асырылатын ұйымдардың басшылары өздеріне сеніп тапсырылған аумақта өрттің пайда болуы мен таралуына жол бермеу жөнінде шаралар қабылдауы;
– автомобиль және темір жол бойындағы ағаш отырғызуды периметрі бойынша кемінде 4 метр жолақпен жүргізуі;
– дала алқаптары ведомстволық бағыныстылығына және меншік нысанына қарамастан жер телімдерінің шекарасы бойынша ені кемінде 4 метр жолақпен жыртылу керек.
Өртті болдырмау мақсатында жанып тұрған сіреңке мен темекі тұқылын жерге тастамаңыздар. Алауды тек топырақ қабатына дейін тазартылған алаңға жағыңыз. Отты сумен сөндіріңіз немесе ошақтың жануы толық тоқтағанға дейін бақылаңыз. Шыны ыдысты және сынған шыныны қалдырмаңыз.
Басталған өртті ұзындығы 2 метрге дейінгі жапырақты ағаштардың бұтақтарымен сөндіріңіз немесе жер лақтырыңыз. Дала өрттерін сөндіру кезінде:
1. Жалынды қаптармен, басқа қолда бар құралдармен өшіріңіз;
2. Егер қолыңызда техника болса, оны да дереу пайдалануға тырысып, өрт учаскесін сөндіріңіз немесе қорғаныс мақсатында жерді жыртуды жүргізіңіз;
3. Ең алдымен, оттың таралуын тоқтатып, одан кейін ең қарқынды жану орындарындағы отты сөндіру керек. Бұл ретте су ағысын жалын емес, жанған жерге бағыттау керек.
Өрт кезінде 101 немесе 112 нөмірі бойынша өртке қарсы қызметке хабарлаңыз!
Көкшетау қаласының төтенше жағдайлар бөлімі.
