ЕЦ-166/24 мекемесінде Тәуелсіздік күні мерекесіне арналған концерттік бағдарлама ұйымдастырылды.
Тәуелсіздік тарихы, маңыздылығы мен еліміздің егемендік жылдары жеткен жетістіктері баян етілген шарада жазасын өтеушілер «Менің Қазақстаным» таныстырылымын тамашалап, Кеңес Одағы Батырлары жайлы көптеген пайдалы мағлұматтар алды. Шара еліміздің Әнұранымен ашылып, одан кейін қатысушылар ЕЦ-166/24 мекемесі бастығының орынбасары, әділет майоры Ж.Досановтың құттықтауына құлақ түрді.
Ал, концерттік бағдарламада жазасын өтеуші Т.Батал күйсандықта шығарма орындаса, З.Шәмшиева мен С.Төлеуова ән шырқады, әрі ақындардың өлеңдерін нақышына келтіріп айтып берді. А.Молдабекова, Г.Әлжанова, К.Балдебекова, Н.Әділбаева да әсем ән орындап, мың бұралып, би биледі. Ч.Оразымбетов ұлы Абайдың өлеңін оқыса, Т.Мусин, Г.Аманова, Д.Жарлықова, Р.Хайруллин шараны ұйымдастырудың басы-қасында жүріп, зор белсенділік танытты.
Осы орайда, мерекелік бағдарламаны сәнді де мәнді өткізіп берген жүргізушілер А.Молдабекова мен М.Нұғыманованың да еңбегін атап өткеніміз жөн. Шара соңында жазасын өтеушілер «Желтоқсан желі» патриоттық бейнебаянын тамашалады.
Ерлан БЕКІШЕВ,
аға әділет лейтенанты.
