«Ақмола Медиа Орталығында» өткен баспасөз мәслихатында Қарағандыдағы «Береке» қоғамдық ұйымының өкілдері «Гүлдену мен дамуға жеткізетін ынтымақтастық» жобасының басталғаны туралы ақпарат берді.
Жобаның басты мақсаты ауылдардағы үкіметтік емес ұйымдардың жұмыс белсенділігін арттыру, оларды әлеуметтік тапсырыстарға мейлінше көбірек тарту, сөйтіп, осы арқылы Мемлекет басшысы Нұрсұлтан Назарбаевтың «Ұлт жоспары – 100 нақты қадам» стратегиясында азаматтық секторға қатысты алға қойған міндеттерін орындау болып табылады. 2018 жылға дейін жоспарланған бұл жоба аясында елді мекендердегі қоғамдық ұйымдармен тренингтер, семинарлар өткізу, олардың өміршең жобаларын қаржыландыру көзделіп отыр.
Баспасөз мәслихатында осы мәселелерге тоқталған бағдарлама үйлестірушісі Меруерт Құрмашова үстіміздегі жылы Ақмола облысының жиырма екі үкіметтік емес ұйымдары арасында сауалнама жүргізілгендігін және оның нәтижесі біздегі азаматтық сектор өкілдерінің белсенділігінің төмен екендігін көрсетіп отырғандығын айтты. Мұның басты себебі, мемлекеттік әлеуметтік тапсырыс аясында қаржыландырудың аздығы, бірлестік жетекшілерінің аудандық, қалалық ішкі саясат бөлімдерімен байланысының төмен екендігінде, үкіметтік емес ұйымдардың көбінде «өзімдікі» деген кеңсенің жоқтығында деп түсіндірілді.
Америка Құрама Штаттары қаржыландырып отырған аталған жобаға қатысуға біздің облыстан барлығы жиырмадан астам қоғамдық ұйым өтініш тапсырған екен. Аршалы, Шортанды аудандарынан төрт қатысушыдан тіркелсе, қалған аудандарда бір-екі үкіметтік емес ұйымнан бар көрінеді. Журналистер қарағандылық меймандарға өздерінің толғандырған сауалдарын қойып, тұшымды жауаптар ала алды.
«Арқа ажарының» өз ақпараты.
