Облыста Қазақстан Республикасы Тәуелсіздігінің 25 жылдығына орай, спорт айлығы басталды. Ол «Саламатты ұлт, спорттық Қазақстан» девизімен өтпекші.
Дене шынықтыру және спорт басқармасының ұйымдастыруымен «Бурабай» спорт сарайының алдына облыстық спорт ұйымдарының екі жүзден астам қызметкерлері мен спортшылары «Таңғы жаттығу» флешмобына қатысу үшін жиналды. Қатысушылар алдында сөз сөйлеген басқарма басшысы Надежда Патюткина аталмыш акцияның маңыздылығын айта келе, облысымыздың спорт алаңдарында күн сайын өткізілетін шараларға тұрғындарды белсене қатысуға шақырды. Ол өз сөзінде спорт салауатты өмір салтының негізі екендігін атап өтті.
Гимнастшы қыздардың жетекшілік етуімен шараға қатысушылар таңғы жаттығулар кешенін орындады. Жаттығушылардың қасынан өтіп бара жатқан бейсауат қалалықтар да қызығушылық танытып, олармен бірге қатарға тұрды.
– Таңғы жаттығуға қатысқаныма өте қуаныштымын. Жастық шағым бірден есіме түсті. Студент кезімізде мұндай жаттығуларды жиі өткізуші едік. Ол біздің күні бойы сергек жүруімізге көп септігін тигізетін, – деді флешмобқа қатысушы Болат Есенбаев.
Тәуелсіздігіміздің жетістіктерін айшықтайтын осындай игі істер енді ай сайын өткізіліп, ақмолалықтар жекелеген жоспар бойынша дайындалған «25 жұлдызды күн» атты шаралардың куәсі болмақ.
«Арқа ажарының» өз ақпараты.
