Қазақстан Республикасының Президенті Қасым-Жомарт Тоқаевтың Жарлығымен Тәуелсіздіктің 30 жылдығы қарсаңында жерлесіміз Баянғали Тоқанұлы Әлімжанов «Құрмет» орденімен марапатталды.
Әдебиет пен өнер әлемінде ақын, жазушы-драматург, суырып салма ақын, жыршы-жырау, сатирик, сыншы, әдебиеттанушы, режиссер, сценарист, киноактер, тілші, кинодокументалист, тележүргізуші, аудармашы, балалар ақыны және балалар жазушысы болып кеңінен танылған Баянғали Әлімжанов 50-ден аса кітаптың авторы екендігін зор мәртебемен айтуға болады.
Биылғы жыл басында Қырғыз Республикасының Президенті Садыр Жапаров Қазақстанға жасаған сапары кезінде жалғыз манасшы, танымал жазушы-драматург Баянғали Әлімжановқа «Достық» орденін өз қолымен табыстағаны да ел мен ер мерейі еді.
Көп қырлы талантты қазақстандықтың туындысы Ұлыбританияда мойындалды және оны белгілі британдық Hertfordshire Press басылымы жариялағаны тағы да бар. «Арқа ажары» газетінің оқырмандары атынан жерлесімізді және газетіміздің тұрақты авторын осы бір қуанышымен құттықтаймыз! Мерейіңіз өсіп, жазарыңыз әлі де көп болсын, Бәке!
