Ақмола облыстық әкімдігі, облыстық мәдениет басқармасы мен облыстық филармонияның құрылтайшылық етуімен және ұйымдастыруымен Көкшетау қаласында биыл осымен үшінші рет өткелі отырған «Көкшетау – тал бесігім» фестивалі облыстық филармонияда сәуір айының 21, 22, 24-і күндері өткізіледі. Биыл бұл шараға алыс-жақын шетелдер мен республикамыздың танымал өнер саңлақтары келеді деп күтілуде.
Бұл музыкалық форумды өткізудегі басты мақсат – халықтық және осы заманғы классикалық музыка тәсілдерімен қоғамдағы өзара түсіністік пен ынтымақтастықты, рухани құндылықтарды, жоғары кәсіби орындаушылық шеберлікті дамыту және музыкалық дәстүрлерді алға апарып, ел мен ел, өңір мен өңір арасындағы мәдени байланыс-тарды қалыптастыру, көрермендер арасында отандық және әлемдік мәдениеттің жақсы үлгілерін
насихаттау. Сонымен бірге, әрине, жергілікті өнерпаздардың келген меймандардың өнердегі толымды жетістіктерінен тәжірибе алып қалуына, олармен рухани үндестік табуларына жағдай жасау.
Үш күндік музыка фестивалінің Көкшетау халқы мен музыканттарына берері мол. Қала тұрғындары әдемі, әсерлі әуен тыңдап, рухани сергіп қайтса, жергілікті жас өнерпаздар үшін бұл үлкен мектеп. Себебі, кәсіби мамандармен бір сахнада өнер көрсетіп, олардың шеберлігін көзбен көріп, шығармашылық байланыс орнатады.
Фестиваль 21 сәуір күні, сағат 18:30-да эстрадалық-үрлемелі және эстрадалық-симфониялық оркестрдің концертімен ашылады. Оркестрдің сүйемелдеуімен жеке орындауда АҚШ-тан келген Гүлдана Жолымбетова, Грециядан келген Владимир Афанасьев пен Петропавл қаласынан келген Игорь Пищур сияқты сыйлы қонақтар өнер көрсетеді. Бұл күні облыстық филармонияның әртістері де сахна сәніне айналады. Ал, оларға Қазақстан Республикасының Мәдениет қайраткерлері Ерназар Оразалин, Геннадий Брюханов пен «Мәдениет саласының үздігі» Илья Федоров дирижерлік етеді.
Фестивальдің екінші күні, яғни, 22 сәуір 18:30-да Германиядан келген Қайыржан Жолдыбайдың, астаналық Дина Хамзина мен Талғат Галеевтың қатысуымен Біржан сал атындағы Көкшетау музыкалық колледжін бітіріп, қазіргі таңда «Астана Опера» мемлекеттік опера және балет театрының солисі болып қызмет етіп жүрген, 2015 жылғы Мәскеуде өткен «Большая опера» халықаралық телебайқауының бас жүлдегері Салтанат Ахметованың жеке концерті өтеді. Концертке Қазақстан Республикасының еңбек сіңірген қайраткері, «Құрмет» орденінің кавалері Абзал Мұхитдинов пен Руслан Баймурзин дирижерлік етеді.
Ал, фестивальдің үшінші кон-церттік бағдарламасы және жабылу салтанаты 24 сәуірде өткізілмекші. Фестиваль облыстық филармонияның, «Астана Опера» әртістері және Кенжебек Күмісбеков атындағы қазақ халық аспаптар оркестрінің концертімен аяқталады. Концертке Қазақстан Республикасының еңбек сіңірген қайраткері Айтқали Жайымов пен Тұрлықожа Базаров және Руслан Қойшыбаев дирижерлік етеді.
Мерген ТОҚСАНБАЙ.
