Мемлекет басшысы Қасым-Жомарт Тоқаев Қазақстан халқы ассамблеясының ХХХІІ сессиясында бейбітшілік пен келісімнің мемлекеттік идеология ғана емес, сонымен бірге, қоғамдық және жеке өмірдің, еңбек етудің құрамдас бөлігі ретінде де қабылдануы тиіс екендігін атап көрсеткен болатын. Бұл құр ұран емес, керісінше, әр азаматтың күнделікті ұстанған көзқарасы болуы керек. Осы құндылықтардың қадірін біліп, құрметтеудің арқасында біздің халық бейбіт өмір сүріп келеді. Өйткені, бірлік бар жерде ғана толыққанды өмір болатындығы түсінікті.
Біздің қоғамның осы бірлігі мен тұтастығын нығайтуда Қазақстан халқы Ассамблеясының ерекше рөл атқарып келе жатқандығын баршамыз жақсы білеміз. Неге десеңіз, Ассамблея қасиетті қазақ жерінде тұратын барлық этностарды біріктіреді.
Әлемнің әр нүктесінде әскери қақтығыстар орын алып жатқан қазіргідей беймаза заманда бір-бірімізді тыңдау, дау-дамайларды әсіре көңіл-күй мен негізсіз қызбалыққа салынбай, халықаралық құқық және жалпыға ортақ азаматтық нормалар шеңберінде шешу – басты міндет.
Осындай жағдайда байыпты көзқарас ұстанып, ешкімге бұра тартпай, сарабдал саясатқа жүгініп отырған біздің мемлекетіміздің бағыты өзін ақтай түсуде. Өйткені, ел азаматтарының мүддесі, көп ұлтты республикамыздың тағдыры, тәуелсіздік мұраты әрқашан бәрінен жоғары тұруы тиіс. Соны басты орынға қойсақ, ұпайымыз түгел болмақ.
Ольга ЛЯН,
«Чинсон» кәріс мәдени орталығы»
қоғамдық бірлестігінің төрайымы.
